Додатоците од рибино масло ја имаат способноста да ги спречат штетните метаболички ефекти од високо масната диета како кај дијабетесот тип 2
Студијата спроведена од страна на истражувачите од Универзитетот во Сао Паоло во Бразил, а објавена во зборникот The Journal of Physiology, се впушти во потрага по одговор за тоа како суплементите од рибино масло може да влијаат врз метаболизмот на глувците кои биле под режим на диета со многу масти. Научниците на заморчињата им давале рибино масло во времетраење од четири седмици пред да им ја променат диетата на високо мастна, со големи количини на масти, но и големи количини на рибино масло. Откако режимот на исхрана завршил, истражувачите ги анализирале примероците од телесните масти кај глувците и ги споредиле со примероците земени од групата којашто исто така јадела масна храна, но не и рибино масло.
Високо мастната храна со себе носи последици по здравјето: дебелина, зголемени нивоа на холестерол и инсулинска резистенција, а сето тоа може да доведе до дијабетес тип 2. Изминативе години рибиното масло се здоби со голема популарност како лек за многу здравствени тегоби. Многу од здравствените придобивки од рибиното масло сè уште не се детално научно проучени. Она што досега е познато е дека рибиното масло претставува омега 3 полинезаситена масна киселина, а содржи и еикозапентанонска киселина и докосахексенска киселина.
Овој состав од многу одамна е познат по тоа што ја подобрува сензитивноста кон инсулин и дека има јак антивоспалителен и хиполипидемичен ефект (ги редуцира мастите), а ја намалува и телесната тежина.
Тимот во предвид земал и низа други фактори што имаат влијание врз метаболизмот, како што е отпорноста на инсулин, но и масните депозити од другите делови на телото. Како што се очекуваше, диетата со високо ниво на масти предизвика значителни промени во многу погледи меѓу кои: зголемување на гликоза и секреција на адипонектин, тумор некрозниот фактор-алфа, интерлеукин-6, липолиза, De novo lipogenesis и секреција на проинфламаторни цитокини.
Оваа низа на метаболички промени не се појавила кај глувците кои консумирале рибино масло за време на масната диета.
„Нашето истражување сугерира дека суплементите од рибино масло може да се употребуваат за надополнување на другите стратегии како превентивна мерка за инсулинската резистенција и дебелина“ – истакна вонредниот професор на Одделот за биолошки науки и главниот истражувач во студијата Мариа Изабел Алонсо-Вејл (Maria Isabel Alonso-Vale).
Ова истражување спроведено врз животински модели, сега треба да се спроведе и врз човечки модели за теоријата целосно да може да се докаже. Ефективните фармаколошки интервенции со екстракти од рибино масло за метаболички нарушувања најверојатно ќе бидат наскоро достапни. „Повеќе истражувања се потребни за подобро да ги разбереме ефектите од рибиното масло врз луѓето“ – додава проф. Мариа.
