Оваа габична инфекција на кожата на стапалата своето име го добила бидејќи најчесто се појавува кај атлетичарите
Кожните инфекции се најзачестени и не се опасни, но може сериозно да влијаат врз квалитетот на живот. Токму затоа, треба соодветно и навремено да се третираат.
Атлетско стапало
Атлетско стапало е габична инфекција на кожата на стапалата која го добила своето име заради честотата на појавување кај атлетичарите. Зашто се јавува најчесто кај спортистите? Поради интензивно потење, долготрајно носење на чорапи и патики, преку кои кожата не „дише“ и се создава влажна средина која е најпогодна за размножување на габичките. Медицинскиот назив е Tinea pedis, a tinea се однесува на габични инфекции кои што може да се појават и на други делови на телото, на главата или ноктите.
Атлетско стапало го зафаќа делот на табаните и кожата помеѓу прстите, а може да се прошири и на ноктите. Најмногу се појавува кај оние спортисти кои што се занимаваат со трчање и брзо одење на долги патеки, но може и да се појави и кај луѓе кои што не се занимаваат со спорт, но кои многу се потат и нивните стапала се долго време изложени на влажна средина, погодна за развој на инфекција. Симптомите вклучуваат:
- Чешање, чувство на печење и црвенило;
- Непријатен мирис на стапалата;
- Сува кожа на табаните која се лупи;
- Појава на лушпеста егзема која чеша и најчесто започнува меѓу прстите;
- Доколку не се лечи навремено, се развива во распукана кожа со меури кои можат да се инфицираат;
- Белузлави, кршливи нокти што се лупат на слоеви.
Бидејќи кожните инфекции се пренесуваат при директен допир, неопходни се мерки за заштита и секако превенција.
Превенција за спортисти
- Задолжително туширање после секој тренинг;
- Темелно бришење на стапалата;
- Перење на целата облека за вежбање, исто така после секој тренинг;
- Перење на чорапите на висока температура (вриење);
- Да не разменуваат крпи или лични производи за хигиена (како жилети за бричење) со други;
- Избегнување на козметичко бричење на целото тело.
Генерални препораки за заштита
Бидејќи станува збор за заразна инфекција која што се пренесува во влажна средина, секогаш кога се наоѓате на места како јавни тушеви и базени, внимавајте да не одите боси и темелно исушете ги стапалата. Во спортските продавници може да најдете чорапи специјално наменети за спортисти, кои што подолго време го одржуваат стапалото суво, како и соодветни патики со можност за вентилација, кои што треба редовно да се чистат.
Како се лечи атлетско стапало
За лекување на ова инфекција се користат лекови против габични инфекции, антимикотици во облик на крем за локална употреба, кои што може да се набават без рецепт. Лекувањето се одвива локално, со едноставно нанесување на крем директно на инфицираната површина. Локалната терапија е најприфатлива опција, поради безбедноста и избегнувањето на системските несакани ефекти.
Соодветниот крем за оваа состојба делува антигабично, антибактериско и антиинфламаторно, односно доведува до брзо намалување на знаците на воспаление и чешање.
Во некои случаи, доколку на оштетената кожа се намножат бактерии, лечењето е отежнато и е потребно да се посети лекар. Исто така, задолжително обратете се на лекар доколку се појават знаци на секундарна бактериска инфекција која се одликува со големо црвенило и оток или пак ако ноктите на нозете ви станат кршливи или ја сменат бојата (стануваат белузлави). Овој облик на атлетско стапало тешко се лекува и обично бара долготрајно медицинско лекување за да се спречи неговото повторување.
