Како да се соочите со чувството на изолираност за време на празниците
За повеќето празничниот период е време на радост поминато во кругот на најблиските и пријателите, додека за некои овој период претставува време на изолација и осаменост. Чувството на осаменост не се појавува само околу празниците. Постојат бројни истражувања и анализи кои што покажуваат дека сè повеќе луѓе се чувствуваат осамени во текот на целата година. Ова особено се однесува на старосната група над 45 години. Чувството на осаменост, статистички разгледано, се продлабочува после 60тата година од животот. Тоа е така најмногу поради животните околности, иселување на децата од семејната куќа со цел да оформат своја, губење на блиски личности или пак губење на саканата личност.
Чувство на осаменост предизвикуваат и надворешни фактори како недоволно парични средства кои што принудуваат на асоцијално однесување, неможност за мобилност и слично. Недостатокот од социјална активност поттикнува чувство на осаменост но ова тврдење треба дополнително да се прошири. Имено, не секогаш значи дека доколку некој е физички сам се чувствува осамено и доколку некој е во друштво не значи дека не се чувствува изолирано и осамено.
Негативните страни од чувството на осаменост, односно како тоа влијае врз физичкото и психичкото здравје се навистина бројни. Изолацијата, психичка или физичка, може да го зголеми чувството на вознемиреност, да доведе до депресија, до зголемување на крвниот притисок, носи ризик од зголемена телесна тежина, срцеви заболувања, го намалува имунитетот и уште многу други последици врз целокупното здравје.
Лошата мисла е отров за телото, буквално. Затоа, обидете се да ги дознаете вистинските причини за вашето нерасположение и што ве доведува до чувство на изолираност. Запомнете дека понекогаш е во ред да се посака изолација. Саморефлексија е секогаш потребна со цел да се биде подобар човек, а чувството на изолираност е поизразено овој период токму поради тоа. На прагот на новата година, повеќето луѓе си поставуваат цели и задачи што сакаат да ги исполнат, а во исто време, размислуваат и за сите грешки што ги направиле во годината што изминала. Нерасположението се јавува заради чувството на каење кое што доминира над позитивниот став за нова можност за подобрување во новата година.
Потрудете се да победи позитивниот став и со убава мисла започнете ја оваа година.
