Медицинско откровение помогна парализиран човек да прооди [ВИДЕО]

Компјутерска технологија која се поврзува со мозокот, може да ги протолкува мислите во движења на нозете – му помогна на еден парализиран човек од половината па надолу поради повреда на `рбетниот столб, да биде првиот пациент кој оди без употреба на роботи – изјавуваат лекарите од Јужна Калифорнија

Првите бавни и тешки чекори на 28-годишниот парализиран маж, беа документирани од страна на една научна студија објавена во Британскиот зборник за невроинженеринг и рехабилитација – British-based Journal of NeuroEngineering and Rehabilitation. Ова беше овозможено со помош на систем кој го заобиколува повредениот `рбетен столб и воедно испраќа сигнали низ компјутерски алгоритам до електродите позиционирани околу колената на пациентот со цел да ги поттикне движењата во мускулите.

Студијата во која бил инволвиран Фриц започнала пет години откако тој станал парализиран и вклучувала месеци на ментален тренинг.

Тренингот се состоел од вежбање на мислите за тоа како тој оди, со цел да се создадат неопходните мозочни импулси кои би ги движеле нозете. Тие импулси потоа биле отчитувани од страна на ЕЕГ – електроенцефалограм којшто тој го носел на капа на својата глава и потоа биле пренесувани на компјутер за понатамошно процесирање од страна на специјален алгоритам, којшто можел да ги изолира пораките наменети само за движењата на нозете и потоа да ги конвертира во импулси кои ги стимулирале мускулите во нозете на пациентот. Пациентот вежбал исто така со помош на видео игри со виртуелна реалност, во кои Фриц се обидувал да го контролира ликот од играта. Тој исто така поминал долготрајна физичка рехабилитација со цел да зајакнат неговите мускули.

Чекорите на испитаникот од студијата – парализираниот Адам Фриц – Adam Fritz, кој го повредил својот `рбетен столб во сообраќајна несреќа на мотор, навидум делуваат скромно. Неговата телесна тежина била делумно потпомогната, што му овозможувало да го држи телото во исправена положба. Д-р Ан До – An Do коавтор на студијата, објаснува дека потпората на телото била неопходна, бидејќи Фриц го изгубил своето чувство во нозете и стапалата.

Истражувачите од Универзитетот во Калифорнија, Ирвин, јужно од Лос Анџелес, изјавија дека исходот одбележува ветувачко, но делумно достигнување на компјутерите кои се поврзуваат со мозокот. Според нив еден ден ова достигнување може да помогне на пациентите со мозочен удар и на жртвите со спинални повреди и кај нив да се врати одредена мобилност. Во претходните обиди на други научници, компјутерската платформа поврзана со мозокот им овозможувала на парализираните пациенти да земат шолја со кафе кон својата уста со помош на роботска рака.

Д-р Ан До, истакна дека клиничките апликации на овој изум бараат уште многу години усовршување. Резултатите од истражувањето во Ирвин, сè уште потребно е да бидат реплицирани кај други пациенти и во голема мера подобрени. И покрај тоа што на овој случај треба уште многу да се работи, студијата потврди дека ова е возможно – дека во иднина парализираните пациенти со повреден `рбет немаат судбина вечно да седат во инвалидска количка. „Возможно е да се поврати интуитивното одење контролирано од страна на мозокот по целосна повреда на `рбетниот столб“ – изјави Зоран Ненадиќ био-медицински инженер кој го предводеше истражувањето.

Истражувачите се надеваат дека наскоро ќе ја усовршат оваа технологија со помош на минијатуризирање на ЕЕГ-то до таа мера што истото ќе може да биде вградено во черепот или мозокот на пациентот.