Симптоми и превенција на топлотен удар

Покрај тоа што топлотната истоштеност не е толку сериозно нарушување како топлотниот удар, таа во никој случај не смее да се потценува, бидејќи може да премине во топлотен удар, кој нелекуван во телото може да предизвика трајни оштетувања

Премореноста од топлина и топлотен удар се најчестите заболувања поради преголема изложеност на топлина и сонце особено во најтоплиот период од денот или пак, поради физичка работа или вежбање за време на горештините, но и поради загубата на вода во организмот.

Истоштеноста од топлина е поблага форма на нарушување поврзано со преголема изложеност на топлина. Овој вид на измореност може да се јави дури и по неколку дена од изложеноста на високи температури и недоволна и несоодветна хидратација на организмот. Топлотната истоштеност е тесно поврзана со топлотниот индекс, кој е мерка за топлината од комбинација на релативната влажност на воздухот и температурата на воздухот. Релативната влажност од 60% или повеќе, го попречува испарувањето на потта, а со тоа и способноста на телото да се олади. Ризикот од топлотна исцрпеност драстично се зголемува кога топлотниот индекс се качува сè до 90 степени и повеќе. Затоа многу е важно, особено за време на топлите бранови, да се следи временската прогноза и извештајот за топлотниот индекс.

Исто така треба да се има предвид дека топлотниот индекс е поголем кога се стои директно под сончевите зраци. Покрај тоа што топлотната истоштеност не е толку сериозно нарушување како топлотниот удар, таа во никој случај не смее да се потценува, бидејќи може да премине во топлотен удар. Луѓето кои имале топлотна истоштеност, потоа се поосетливи на високи температури во текот на наредните неколку дена. Затоа препорачливо е во тој период да немате голем физички напор и да ги следите советите од лекарот.

Постојат два вида на топлотна истоштеност:

1. Поради загуба на вода – симптомите најчесто се: неопислива жед, ослабеност, главоболки и губење на свест;
2. Поради загуба на сол и други минерали – симптомите најчесто се: гадење и повраќање, грчеви во мускулите и вртоглавици.

Симптоми на топлотна истоштеност:

• Обилно потење;
• Грчеви во мускулите;
• Замор;
• Слабост;
• Вртоглавици;
• Главоболки;
• Гадење и повраќање;
• Темна урина;
• Студена и влажна кожа;
• Бледа кожа;
• Забрзано дишење;
• Пулсот може да биде бавен и слаб;
• Болки во абдоменот.

Доколку топлотната исцрпеност не е лекувана, може да резултира со топлотен удар.

Топлотниот удар е најсериозното нарушување од премногу топлина.

Телесната температура може да се качи и над 40,5 ºС во рок од 10-15 минути. Топлотниот удар може да го оштети мозокот и другите витални органи, а во најтешки случаи може и да предизвика смрт. И покрај тоа што лицата во години се поизложени на топлотен удар, со топлината и сонцето нема играње играчки, бидејќи секој може да биде жртва, па дури и здравите спортисти.

Симптоми на топлотен удар:

• Сува, црвена и жешка кожа (без потење);
• Брз и слаб пулс;
• Збунетост;
• Телесна температура над 40 ºС;
• Епи-напади;
• Главоболка;
• Ослабеност во мускулите;
• Несвест.

Кога кај себе или кај некого ќе препознаете симптоми на топлотна истоштеност или на топлотен удар, препорачливо е веднаш да се обидете себе или лицето да го оладите на некој начин. Пред сè треба да го сместите во сенка или на климатизирано место, најдобро на студен под и да ја влажните кожата со помош на сунѓер или по студеното туширање да се обложи со мокри крпи. Пожелно е на лицето да му се подигнат нозете и да се отстранат тешките и тесни делови од облеката. На лицето треба да му се дава да пие студена вода или некаков друг безалкохолен пијалак без кофеин. Пожелно е да се вклучи вентилатор во просторијата. Доколку во рок од 15 минути ниту една од превземените мерки не ја подобрува состојбата на лицето, пожелно е да се повика брза помош.

Децата до 4 годишна возраст и старите луѓе (над 65 години) се поизложени на овој тип топлотни нарушувања, бидејќи потешко се прилагодуваат кон голема топлина.

Луѓето кои се хронично болни (проблеми со срцето, дебелина, бубрези, алкохолизам, дијабетес и др.) исто така треба многу да внимаваат во најтоплите периоди од денот, но и оние кои се под одреден тип на терапија и примаат лекови како: диуретици, седативи, лекови за смирување, стимулатори, лекови за срце и крвен притисок, како и лекови за психијатриски заболувања.

Заштитувајте ја кожата од сонце со креми со заштитен фактор, носете соодветна, лесна, провевна и светла облека, носете шешири и очила за заштита сонце и пијте многу вода, а најдобро доколку обврските ги поместите за утринските или вечерните часови.