Геловите за интимна нега се поврзани со 8 пати поголем ризик од габична инфекција.
Производите за интимна нега за жените опфаќаат широк спектар на различни типови производи, од креми и гелови до сапуни и влажни марамчиња. Жените денеска ги користат овие производи за секојдневно одржување на интимната хигиена, но прашањето дали тие знаат дека истите може да предизвикаат негативни ефекти на нивното здравје сè уште останува неодговорено.
Некои производи што се наменети за жените, како што се тампоните и влошките се нужни за користење, но многу други производи меѓу кои производите за интимна нега не се неопходни за одржувањето на личната хигиена. Напротив, сè повеќе научни студии откриваат дека тие може да му наштетат на женското здравје. Но многу жени ги купуваат со надеж дека, за разлика од обичните сапуни кои понекогаш се абразивни или иритирачки, тие ќе обезбедат правилна нега без да му наштетат на здравјето на чувствителните делови од женското тело.
Една нова студија спроведена од истражувачите од Универзитетот во Гулф во Онтарио, Канада, открива нови факти за овие производи. Истражувањето, кое ги зема предвид информациите за интимното здравје на 1.435 жени од Канада, откри дека производите за интимна хигиена се популарни кај женската популација, но нивната употреба загрижувачки корелира со зголемениот ризик од инфекции на вагината или уринарниот тракт.
„Оваа студија открива што сè, всушност, прават жените во врска со нивното интимно здравје и идентификува поврзаности што истражувачите сега можат да ги разгледаат одблиску“, објаснува авторот на студијата, Киран О’Доерти.
Производи за интимна нега и ризикот од инфекција
Според сегашната студија, околу 95 отсто од жените во Канада користат производи за интимна хигиена. Но, исто така, важно е да се забележи дека голем број од овие 95 отсто е многу веројатно да развијат некој тип на инфекција.
По испитувањето на учесниците, тимот забележал дека хигиенските производи што најчесто ги користеле жените вклучувале креми за намалување на иритација, навлажнувачи, лубриканти и влажни марамчиња за интимна нега.
Одредени од овие производи биле поврзани со поголем ризик од некои типови на инфекции. Всушност, геловите за интимна нега биле поврзани со 8 пати поголем ризик од габична инфекција, како и речиси 20 пати поголем ризик од бактериска инфекција. Лосионите за интимна нега и други видови вагинални средства за чистење биле поврзани со 3,5 пати повисок ризик од бактериска инфекција и 2,5 пати повисок ризик од уринарни инфекции.
Употребата на влажни марамици за интимна нега, исто така, била врзана со двоен ризик од уринарни инфекции, додека лубрикантите и кремите за навлажнување биле поврзани со 2,5 пати повисок ризик од габична инфекција.
Сепак, студијата не утврдува дали производите се оние кои ги предизвикуваат инфекции на прво место или, пак, жените кои ги користат производите во обид да се справат со некоја инфекција. Сепак, резултатите даваат значаен доказ за силни корелации за кои треба понатамошно истражување.
Спречување на растот на здрави бактерии
Истражувачите кои ја водеа студијата сметаат дека одредени состојки пронајдени во производите за интимна нега можат да ја нарушат природната рамнотежа на вагиналните микробиоми со што се елиминираат добрите микроорганизми кои придонесуваат за одржување на доброто интимно здравје на жените.
„Овие производи може да го спречат растот на здравите бактерии коишто се потребни за борба против инфекциите“, потенцира О’Доерти.
Во својот труд, истражувачите, исто така, предупредуваат дека нерамнотежата на вагиналните микробиоми може да предизвика голем број здравствени проблеми, вклучувајќи карлична инфламаторна болест, намалена плодност, рак на грлото на матката, бактериска вагиноза и поголема подложност на сексуално преносливи инфекции.
Зошто жените сè уште избираат да користат многу несоодветни производи за интимна хигиена?
Одговорот на ова прашање, според О’Доерти и неговите колеги, е едноставно дека можеби тие не се свесни за ризиците што ги носат овие производи.
Тој потенцира дека денеска жените користат секакви средства за одржување на интимната хигиена, притоа игнорирајќи го фактот дека тие можеби можат да доведат до потенцијални здравстени ризици за нивното здравје.
Имено, истражувањата покажуваат дека за оваа година приходите на САД од продажбата на производи за интимна хигиена за жените досега изнесуваат 2,729 милиони долари.
