Споделете со пријателите!
Јапонската практика Shinrin-yoku или пешачење во планина е научно докажано корисна за здравјето
„Shinrin-yoku – да се биде опкружен со дрвја и да се покаже тивка почит кон природата – е дел од јавната здравствена програма на Јапонија“
Добро познат факт е дека природата е корисна за нашето здравје. Важноста од пристап до зелени површини за сите е и научно докажана. Престојот во природа поттикнува физичка активност и има многу здравствени придобивки. Јапонската практика на престој во шума, Shinrin-yoku (јапонски термин-кованица), докажано ја регулира работата на срцето и крвниот притисок, ја намалува продукцијата на стрес хормони, го јакне имунитетот и ја подобрува целосната добросостојба. Престој во шума, односно да се биде опкружен со дрвја и да се покаже тивка почит кон природата, е дел од јавната здравствена програма на Јапонија од 1982 година.
Оваа јапонска практика е поврзана со подлабока филозофија на изразување почит кон природата со мирна контемплација. Без планинарење, без броење на чекори, без гласни звуци. Целта е целосно опуштање, без потреба да се постигне нешто.
Во периодот од 2004 до 2012, јапонската влада потроши околу 4 милиони долари на истражувања за откривање на физиолошките и психолошките ефекти од престој помеѓу дрвја. Овој ефект може да го добиете и со посета на градскиот парк. Дури и краткиот престој во природа може да го намали стресот, но постојаното одење во природа во времетраење од два часа, го подобрува имунитетот и ја подобрува целокупната добросостојба.
Споделете со пријателите!
