Прочитајте неколку причини зошто срцевите удари се почести во зима
Неколку истражувања покажале дека во зима, срцевите удари се двојно почести отколку во лето. Повеќето теории истакнуваат дека факторите на средината како ниските температури и загаденоста на воздухот, имаат важна улога за појава на кардиоваскуларните болести кај двата пола, особено кај повозрасната популација. Сите истражувања водат до можниот заклучок дека ризикот од кардиоваскуларни заболувања е најголем во зима.
Загаден воздух
Високо ризичните групи, како постарите лица, малите деца, бремените жени и оние кои страдаат од хронични болести на срцето и белите дробови, се почувствителни во однос на загадувањето на воздухот. Според Европската агенција за животната средина, ПМ-честичките можат да предизвикаат или да ги влошат кардиоваскуларните и белодробните заболувања, да предизвикаат срцеви напади, аритмии и карцином, проблеми при пораѓањето итн.
Грип
Инфекцијата е уште една причина за срцев удар. Вирусот на грип предизвикува воспалителен процес и придонесува за згрутчување на крвта во крвните садови, што може да предизвика таложење на масни наслаги на артерискиот ѕид, што доведува до блокада на коронарните артерии, главна причина за срцев удар.
Физички напор
Ладното време и физичкиот напор можат да бидат лоша комбинација затоа што срцето се оптоварува. Доколку веќе имате проблеми со срцето, не вежбате редовно или ако сте во поодминати години, консултирајте се со лекар пред да се одлучите да го чистите снегот. Тешката лопата полна со снег или пак одењето низ наталожениот снег се сметаат за таков вид на физички напор кој може да го оптовари срцето.
Еве неколку знаци кои ќе ви укажат дека е најдобро да се обратите на лекар затоа што има шанса да доживувате удар:
- Чувство на непријатен притисок или болка во градите кое трае повеќе од неколку минути или пак поминува и повторно се појавува;
- Болка или непријатност во едната или двете раце, грбот, вратот, вилицата или желудникот;
- Недостаток на воздух кој може да е или да не е проследен со притисок во градите;
- Ладна пот, гадење или зашеметеност.
Останати сезонски ризик фактори се и висок холестерол, висок крвен притисок, недостаток на сон и ниско ниво на витамин Д.
Знаењето дека причинители се надворешните и биолошките фактори, може да се искористи за подобрување на превентивните мерки и едукациските стратегии. Луѓето треба да бидат информирани за зголемениот ризик од кардиоваскуларни заболувања за време на зимскиот период и да се едуцираат за важноста од физичка активност и носење топла и соодветна зимска облека. Исто така, секој треба да се мотивира да внесува здрави животни навики и да консумира храна богата со витамин Д како риба, рибино масло и жолчка од јајце, некои видови на печурки како шампињони и шитаке. Исто така, погрижете се да спиете околу 7 до 8 часови секоја вечер и да избегнувате сообраќајни гужви и големи толпи.
