Неконтролираното гледање телевизија резултира со последици по здравјето
Телевизијата почнува да зема замав во педесетите години на минатиот век и „зависноста од гледање телевизија“ е сé уште нов феномен, што придонесува потешко да ја препознаете. Границата меѓу „редовно гледање на омилената серија“ и „зависност од телевизијата“ е многу тенка и треба да се запрашате дали оваа активност ви причинува задоволство или само ви го одвлекува вниманието и ве спречува да ги правите работите што ги сакате.
Неконтролираното гледање телевизија резултира со последици по здравјето меѓу кои и зголемување на телесната тежина, а генерално, зависниците имаат огромен недостаток од физичка и ментална стимулација. Од ова може да произлезе поголем здравствен проблем, кој зависи и од други фактори индивидуално. Ако сте зависни, во пракса ќе губите контрола во личните шеми на однесување. Овој вид на зависност е малку испитуван од стручни лица, но има одредени знаци во однесувањето кои укажуваат на неа:
- Се повлекувате во себе кога не можете да гледате телевизија;
- Чувствувате голема возбуда, еуфорија, во текот на активноста;
- Размислувате за наредниот пат кога ќе го правите истото;
- Се повлекувате, не се социјализирате и имате проблеми во врските со другите;
- Манифестирате агресија, лутина или фрустрација кога некој ве попречува да ја извршите активноста.
Како и за секоја друга зависност потребно е време и методи за да ја победите и секако, да не очекувате нештата да се променат преку ноќ. Што да направите?
За почеток изберете само една омилена серија, шоу и сл. и вклучувајте го телевизорот или седнете пред него само во определеното време. Уште на почеток многу е важно да поставите временски граници и истите да ги почитувате. Во меѓувреме, часовите што претходно сте ги трошеле на оваа активност, мора да ги исполните со друга или со повеќе здрави активности: спорт, курс, работа во домот, активност на отворено или прошетки во природа. Со оглед на тоа дека станува збор за зависност, многу е веројатно да се откажете по неколку обиди за создавање нови навики. Затоа добро е да ги вклучите вашите блиски, оние со кои живеете, пријателите или партнерот.
Штом ќе почувствувате дека може критички да погледнете на периодот во кој неконтролирано сте гледале телевизија, размислете колку навистина ви е потребна и кој е бенефитот од неа. Ако сметате дека има што да добиете, држете се до правилото за една омилена серија, шоу и сл. барем извесно време.
Добро е да ги анализирате и другите ваши навики: како се храните, дали читате, каков ви е социјалниот живот.
Човекот има тенденција да го применува во секојдневниот живот она што во голема мера му извршило влијание преку медиумите. Така, ако не се грижите дали сте јаделе денес свежо овошје и зеленчук или сметате дека газираните пијалоци припаѓаат на групата „течности што треба дневно да се внесуваат во телото“, веројатно ќе треба да вложите уште многу напор за целосна трансформација на животниот стил.
Авторски текст на Марта Димитров
