Жени во менопауза – ризик група за појава на уринарна инконтиненција
Менопаузата е дефинирана како природна појава која го обележува крајот на менструалниот циклус. Менопаузата кај жените обично се јавува после 45-тата година. Причината за менопауза е промената на хормоналниот баланс, односно прекинот на јајниците да произведуваат естроген. Со намалувањето на нивото на естроген се зголемува ризикот за кардиоваскуларни болести, остеопороза, рак на дојка и уринарна инконтиненција.
Уринарна инконтиненција е неспособност да се задржи урината во мочниот меур затоа што контролата врз урнарниот сфинктер е слаба или изгубена. Оваа појава е присутна кај милиони жени во менопауза а бројот се зголемува со зголемување на возраста. Намалените нивоа на естроген за време на менопауза предизвикуваат истенчување на зидот на уретрата. Мускулите околу уретрата и мочниот меур исто така ослабнуваат. Како резултат на ова, жените после 45 години имаат зголемен ризик за развој на уринарна инконтиненција.
Најчест тип на инконтиненција кај жени во менопауза е стрес инконтиненција, при која доаѓа до неволно испуштање на урина, кога се врши притисок врз мочниот меур.
Ова се случува при кашлање, кивање, смеење или при кревање поголема тежина. Ургентна инконтиненција е исто така присутна во оваа состојба. Потребата за мокрење доаѓа одеднаш, и најчесто не може да се стигне навреме до тоалет. Ноктуријата е исто така присутна кај жени во менопауза, така што ургентната потреба за мокрење е зголемена во текот на ноќта.
Уринарните инфекции кои се почести по менопаузата знаат да бидат причина за печење при мокрење. Иако уринарната инконтиненција е честа појава за време на перименопауза и менопауза, не треба да се сфати за нормална појава, треба да се реагира и да се побара помош.
Сексуалниот живот е уште едно поле каде уринарната инконтиненција предизвикува нелагодност. Статистиката покажува дека четвртина од жените со уринарна инконтиненција имаат проблем со сексуалниот однос. За да се олеснат симптомите се препорачува да се прават кегелови вежби (за да се зајакнат мускулите), треба да се избегнува кафе и алкохол, да се избегнува пиење течности во вечерните часови и да се внимава на вишокот на килограми. Лекови кои се избор при третман на уринарна инконтиненција се антихолинергици-антимускариници. Во оваа група лекови спаѓаат: солифенацин, оксибутинин, дарифенацин и др.
Д-р Владко Филипов, специјалист уролог
