Споделете со пријателите!

Стомачните тегоби започнуваат со првиот залак, затоа секогаш внимавајте што и колку јадете
Во топло лепче или пица штотуку извадена од рерна доцна навечер, уживаат сите ваши сетила, сè додека стомакот не ви ја расипе забавата. Оваа навика на јадење навечер е една од многуте навики коишто предизвикуваат стомачни тегоби. Стомачната нелагодност, надуеноста, желудочните киселини и чувството на жарење зад градната коска, познато како жиговина, се најчестите стомачни тегоби. Секој некогаш почувствувал желудочни киселини и жиговина, а најпогодени се оние со зголемена телесна тежина, оние што обилно јадат или се пушачи.

Кога најчесто се појавува жиговина

Најчесто е поврзана со неправилно (лошо) варење на храната, диспепсија, чир на желудник, ГЕРБ (гастроезофагеална рефлуксна болест), езофагитис, акутен или хроничен панкреатит, воспаление на желудникот, гастритис или нетолерантност на лактоза. Исто така, зголемената желудочна киселина и чувството на киселост во устата, најчесто е присутна во последната фаза од бременоста, заради промената на нивото на хормони како и зголемување на абдоминалниот притисок. На бремените жени им се препорачуваат мали промени во животните навики, но доколку имаат потреба од лекови, задолжително треба да се консултираат со лекар.

Многу луѓе секојдневно ја поднесуваат и толерираат оваа непријатност без ништо да преземат.

Добрата вест е дека постојат многу начини поврзани со промена на животниот стил коишто можат позитивно да влијаат врз оваа состојба:

Помали оброци. Промената започнете ја со помали и почести оброци. Се препорачуваат три главни јадења и три ужини дневно во еднакви интервали со цел да се избегне глад или прејаденост во текот на денот. Со други зборови, да се направи и одржи ритам во исхраната и да избегнувате да се прејадувате.

Прочитајте:  Дали да заминете на студии во странство?

Не јадете доцна. Вечерајте три часа пред да легнете да спиете и избегнувајте доцна ужина. Јадењето непосредно пред легнување создава гастрични тегоби. Не легнувајте и после ручек, а кога лежите, главата нека ви биде подигната.

Не е важно само кога, туку и што јадете. Доколку често имате стомачна нелагодност, избегнувајте ги производите коишто предизвикуваат киселини како: лута храна, црвено месо, тестенини, цитрусни плодови, домати, чоколадо. Избегнувајте конзервирана храна, кисела храна, како и пржени и масни јадења.
stomacnite-tegobi-zapocnuvaat-so-prviot-zalak_image1

Избегнувајте го стресот и анксиозните состојби. Здравјето на желудникот е директно поврзано со стресот. Желудникот е многу чувствителен на стрес а анксиозноста многу често предизвикува киселини, гастрит, чир.

Важно е и што пиете. Избегнувајте газирани пијалаци и кафе, чај, какао, сок од портокал. Не е задолжително да ги елиминирате доколку не ви прават проблеми, со исклучок на газираните пијалаци, коишто се штетни за секого.

Внимавајте на килограмите. Прекумерната телесна тежина дополнително го оптоварува желудникот и предизвикува киселините да се враќаат во хранопроводот.

Лекови антациди. Тие го неутрализираат и намалуваат вишокот желудочна киселина и овозможуваат брзо ублажување на чувството на жарење зад градната коска (жиговина) и на надуеноста. Кои лекови ќе ги земате, зависи од повеќе индикатори како: зачестеност на стомачни тегоби, точни причини, здравствена состојба, па така, најдобро е претходно да се консултирате со вашиот лекар.


Споделете со пријателите!