Лондонскиот ресторан Dans Le Noir нуди искуство кое сигурно нема да го заборавите до крајот на животот
Ресторанот Dans Le Noir (во превод од француски – „Во темнина“), ги поседува сите карактеристики што треба да ги има еден добар ресторан – врвна услуга и квалитетно мени. Единствената разлика се состои во тоа што ќе треба да јадете во целосна темнина. Концептот на јадење во мрак, претставува врвно гастрономско искуство, бидејќи за сметка на видот, се засилуваат сите други сетила. Персоналот е составен од слепи лица кои што ве водат до вашата маса и ве послужуваат во текот на вашиот престој таму.
Идејата за ваков ресторан, потекнува од намерата да се покрене свеста за лицата со попреченост во видот.
Секако дека се поставува прашањето дали тоа што не ја гледате храната може да влијае на апетитот и уживањето во оброкот. Оние што го посетиле, велат дека храната е многу вкусна, а чувството незаборавно, бидејќи е предизвик да се јаде без гледање. Исто така, ова искуство полесно поттикнува разговор со луѓе кои што не ги познавате, бидејќи гостите се поопуштени, на тој начин создавајќи одлична атмосфера и место за дружење. Некои од правилата на ресторанот, вклучуваат отстранување на мобилни телефони и часовници што светат за време на ручекот. Кога ќе ја направите резервацијата, ве советуваат да дојдете 15 минути порано за да ви го објаснат менито и да ви кажат како полесно да се снаоѓате во темнина.
Овој концепт не само што е необично искуство за посетителите, туку претставува и можност за вработување и водење нормален живот на слепите лица. Во овој ресторан доаѓаат и многу слепи лица со своите семејства, сакајќи на тој начин да споделат како е да се живее во мрак.
