„Остани супер! Победи го дијабетесот“ е слоганот на овогодишениот Светски ден на здравјето
Светскиот ден на здравјето се одбележува секоја година на 7 април, заедно со денот на основањето на Светската Здравствена Организација – WHO. СЗО секоја година избира еден светски здравствен проблем и на тој ден организира меѓународни, регионални и локални манифестации, со цел да се истакне значењето на избраниот глобален здравствен проблем. Оваа година, Светскиот ден на здравјето се одбележува под слоганот: „Остани супер! Победи го дијабетесот“.
Темата е одбрана бидејќи сè повеќе луѓе заболуваат од дијабетес како последица од прекумерна телесна тежина и физичка неактивност, вклучувајќи ги и децата. Овогодинешната кампања првенствено се однесува на земјите со среден и слаб финансиски развој, со цел да овозможи ефективни и достапни активности за борба против дијабетесот.
Дијабетесот, или шеќерна болест, е хронично системско пореметување на метаболизмот, кое се карактеризира со хипергликемија, односно трајно зголемување на нивото на гликоза во крвта. Постојат 2 главни форми на дијабетес. Луѓето со дијабет тип 1 обично не произведуваат своj инсулин хормон и затоа користат инсулински инекции за да преживеат. Луѓето со дијабет тип 2, кој се наоѓа кај околу 90% од случаите, обично произведуваат свој инсулин, но не е доволно неговото количество или не се во состојба да го користат правилно.
Начелата за подобрување на оваа состојба, според СЗО вклучуваат: здрава храна и намалување на шеќер во исхраната, постојана физичка активност, проверка доколку постои сомневање дека лицето има дијабетес (симптомите вклучуваат зголемена жед, глад, губење на тежина, замор и заматен вид), контролирање на состојбата со медицински третмани и избегнување штетни навики како пушење.
Клучни пораки на Светскиот ден на здравјето за 2016 година:
- Епидемијата на дијабетес бележи значителен пораст во многу земји, особено во земјите со среден и слаб финансиски развој;
- Голем дел од случаите на дијабетес можат да се спречат со едноставни промени во животниот стил. Одржување на нормална телесна тежина, редовна физичка активност и здрава исхрана, можат значително да го намалат ризикот од дијабетес;
- Дијабетесот може да се лекува. Тој може да се одржува под контрола. Зголемување на пристапот до дијагноза, едукација за самопомош и достапно лекување, се витални компоненти за целокупно подобрување на општата состојба со дијабетесот;
- Напорите да се превенира и да се лекува дијабетесот ќе бидат важни за постигнување на Глобалната цел 3 за одржлив развој, која го таргетира намалувањето на предвремена смртност од незаразни болести за една третина до 2030 година.
Главната цел на оваа кампања е формирање на Глобален извештај за дијабетес, кој ја објаснува борбата и последиците од дијабетесот, како и промовирање на постабилен здравствен систем за превенција и поефективно третирање на дијабетес.
