Хороскоп за 6та недела: Прочитајте за кого љубовта е само настинка, за кого хронична болка што ја влече цел живот, а кој само слушнал дека постои.
Овен
Директни и искрени, вие со љубовта немате проблем, сè додека таа е интересна и не бара преголем труд. Вашата импулсивност ќе обезбеди денот на вљубените да го поминете сами, и најверојатно тој период ќе се занимавате со некоја физичка активност. Можно е да доживеете мала физичка повреда која ќе биде производ на вашето нетрпение.
Бик
Кралеви и кралици на ферментацијата, оваа недела е вашето време да сјаете. Вам не ви се потребни причини за славење, бидејќи вие хедонистички го славите животот секој ден. Ќе ви дадеме совет кој тврдоглаво ќе го игнорирате: Од лечење на душата, најмногу пати црниот дроб.
Близнаци
Вашата непредвидливост ве прави добри љубовници но лоши партнери. Неделава ќе патите од вртоглавици заради вашето однесување, бидејќи едно зборувате, друго мислите, а постапувате сосем поинаку. Вие сте децата во хороскопот и за вас сè е игра, собирате љубовни жртви како сликички во албум.
Рак
Ако Близнаците се децата, тогаш вие сте мајките во хороскопот. Заедништвото за вас не е само институција, туку храм. Неделава ќе имате проблеми со дишните патишта како производ од преголемата прашина од под тепихот, местото каде што ги складирате сите ваши проблеми додека монтирате насмевка на вечна среќа. Заљубени (несреќно) во љубовта.
Лав
На вашата животинска привлечност не и’ е потребна надворешна убавина за да заведе. Но вашиот шарм е површен и оние што живеат со вас, секојдневно се борат со вашата горделивост и самобендисаност. Вие славите кога сакате, вам не ви требаат датуми да ви кажат што да правите.
Девица
Вие посакувате да постоеше упатство за љубовта како што има упатство за употреба на производи. Вашата реалност честопати е сурова и ги повредува луѓето околу вас. Вие заљубувањето го сметате за слабост, а љубовта со рок на траење. Мајстори во криење на емоции, но аматери во самотија. Лоша комбинација.
Вага
Вам единствена цел во живот ви е да бидете во право. 14 февруари ќе го прославите во голем стил, а особено ќе уживаат оние Ваги кои што нема да можат да си го дозволат тој луксуз. Желбата да сте постојано главни во врската, може да доведе до болки во грбот како резултат од ножот забиен од саканата личност. Романтично.
Шкорпија
Големите очекувања што другите ги имаат за вас дека сте добри љубовници, неделава ќе ви донесат стрес. Вие сте страсни, агресивни и хедонисти, но не на пријатен начин како Биковите. Вашето љубовно мото: тоа што го сакаш чувај го блиску до себе, на пример во подрум. Ваша омилена храна: несигурноста на другите.
Стрелец
Цело е кога има сè, а тоа сте вие. Добра смисла за хумор, оптимизам и привлечна надворешност. Омилени и сакани, за вас љубовта е убава и лесна. Оние што се во врска, периодов нека се пазат од паничен напад бидејќи е можна понуда за брак.
Јарец
Можеби не сте забавни, ниту сензуални но имате стил. Премногу свесни дека вашата надворешност ветува многу повеќе за разлика од тоа што се наоѓа внатре, постојано ќе се обидувате да изгледате опуштено. Вистината е дека сте стегнати и конзервативни. Досадни сте дури и во хороскоп. Сте прочитале дека доколку се опуштите, сте одлични љубовници.
Водолија
Шармантни и комплицирани, но многу непредвидливи, вие сте магнет за спротивниот пол. Аналитични и брзи во размислувањето, вам воопшто не ви е гајле за мислењето на другите. Вечни индивидуалци кои го следат својот пат, вам не ве интересира безначајна забава за толпата.
Риби
Единствено полошо од тоа да сте лоши љубовници, е да сте свесни за тоа. И тоа е сè што треба да се знае за вашиот љубовен живот. Тој недостаток успешно го канализирате во креативност, па од вас може да се очекуваат најубавите напишани стихови и љубовни писма.
