Бројни студии ја имаат потврдено долговечноста на населението што се храни со Медитеранска исхрана
Западниот стил на исхрана се карактеризира со богато количество калории, брза храна, црвено месо, заситени масти што генерално води до високо ниво на холестерол во крвта. Од друга страна пак, медитеранската исхрана е целосна спротивност. Овде рибата го заменува месото, маслиновото масло маргаринот, се практикува почеста употреба на овошје и зеленчук, и се препорачуваат умерени количини на црвено вино. Овие намирници содржат многу помалку калории и обезбедуваат многу антиоксиданси (β-каротен, витамин Е, полифеноли) како и незаситени масни киселини како што се омега 3.
Една од главните компоненти на Медитеранската исхрана е маслиново масло. Неговата лековита моќ лежи во фактот дека негова главна состојка е олеинска киселина. За разлика од киселините присутни во повеќето други масла (на пр. палмитинска и стеаринска киселина), олеинска киселина е Мононезаситена масна киселина и покажува висока отпорност на процесот на оксидација, што значи дека маслиновото масло е многу повеќе отпорно кон оксидација и создавање штетни материи од процесот на оксидација (слободни радикали).
Редовно консумирање на маслиново масло води до намалување на нивото на холестеролот во крвта.
Замената на црвеното месо со риба е една од главните придобивките на медитеранската кујна. Рибата е богата со омега 3 масни киселини кои се од суштинско значење за раст и развој на децата, намалувањето на холестеролот и вкупните масти во крвта, во спречувањето на срцев удар, и се корисни во лекувањето на псоријаза и други кожни болести како што се атопичен дерматитис, како и разни воспалителни процеси.
Општо познато е дека пицата е една од главните и чести јадења на Медитеранската кујна. Но, дали е тогаш и пицата здрава? Одговорот на ова прашање во совет со нашиот нутриционист е да, пицата е здрава но на определен начин. Се прашувате како е можно тоа? Поради големите количини на домати кој ги содржи, пицата може да се смета за здрава храна. Домат содржи пигмент ликопен, кој дејствува како антиоксиданс, не штити од срцев удар и позитивно влијае на здравјето на простатата. Ликопенот е практичен само кога се готват доматите, што не е случај и со свежите домати кои не го ослободуваат во свежа состојба. Имено при мала термичка обработка на доматите, ликопенот станува достапен на нашето тело и ја менува својата конфигурација од транс во цис форма.
Исхраната богата со овошје и зеленчук обезбедува голема количина на витамини и минерали.
Важна улога игра и витаминот Ц кој дејствува како антиоксиданс и го зајакнува одбрамбениот систем на телото. Медитеранска кујна е позната и по консумирање на црвено вино. Препорачаната количина од 1-2 чаши на ден има корисен ефект врз здравјето, бидејќи содржи полифеноли, кои дејствуваат како еден од најмоќните антиоксиданси и го забавува згрутчувањето на крвта, а исто така го намалува ризикот од срцев удар. Секако тоа се должи најмногу на присуството на еден од најкорисните полифеноли-ресвератрол.
Медитеранскиот начин на спремање на храната подразбира храна приготвена на пареа, без многу преварување, готвење со малку масло што е можеби чиста спротивност од нашиот традиционален начин на спремање на храната со долготрајно варење и термичка обработка.
Продуктите треба да се готват за да ги свари полесно нашиот дигестивен систем (кога храната е приготвена на пареа или динстана хемицелулозата и целулозата омекнуваат и телото полесно ги апсорбира хранливите материи), да добие на вкус, за безбедност и за да ја зголемиме искористливоста на хранливите материи. Повеќето зеленчуци од семејството на кромидот содржат сулфурни соединенија кои го штитат нашето здравје. Ако кромидот го загреваме 5 мин, ќе го зголемиме бројот на сулфурните соединенија. Телото полесно го апсорбира ликопенот, важен антиоксиданс, од готвениот домат отколку од суровиот. Кога доматот благо термички се обработува се разградува клеточната матрица на доматот и преоѓа од транс во цис облик кој е поискористлив. Друг пример за поголема биоискористливост на хранливите материи кога храната се вари се морковите. Имено, со варење на морковот се ослободуваат 40 % каротеноиди или со други зборови морковот има повеќе антиоксиданси откако ќе се зготви. Некои продукти особено месото, јајцата треба да се варат за да се избегне изложување на бактеријата Escherichia Coli или труење со салмонела. Исто така, некои мешунки треба да се варат за да се отстранат токсините на пр., од мексиканскиот грав со варење се деактивира хемаглутинин кој ја инхибира способноста на црвените крвни клетки да се врзат со кислородот или пак, варењето на сојата го деактивира трипсинот кој ја спречува асимилацијата на метионин која е есенцијална аминокиселина.
Житарките, исто така, треба да се варат, киснат или ртат за да се намали фитинската киселина во нив која делумно ја блокира достапноста на минералите. Од друга страна, пак, постојат голем број на продукти кои не треба термички да се обработуваат како што се млечните производи, овошјето, јаткастите плодови, билки, повеќе видови на зеленчук.
