Не го отфрлајте лебот од исхраната 

Медицинските извештаи го истакнуваат значењето на влакната во исхраната, особено на тие коишто потекнуваат од житата

Со векови наназад, лебот е основна намирница во исхраната. Доколку на лебот му го вратите местото на вашата трпеза, ќе си обезбедите добро здравје. Лебот претставува значаен извор на хранливи влакна во исхраната и обезбедува една четвртина од дневните потреби. Влакната што ги има се незаменливи, бидејќи помагаат за чистење на организмот. Медицинските извештаи и експертите за исхрана го истакнуваат значењето на влакната во исхраната, особено на тие коишто потекнуваат од житата. 

Да, лебот спаѓа во јаглехидрати. Но, јаглехидратите не се толку штетни за нас. Всушност, јаглехидратите се (едноставно кажано) „гориво“ за телото и доколку тоа гориво е квалитетно, телото подобро ќе работи. За да го постигнете ова, наместо бел леб, изберете леб од интегрално брашно, кој содржи здрави јаглехидрати коишто побавно се варат и заситуваат.

Според видот на употребените суровини, основните видови леб можат да бидат подготвени од брашно на одделни житни култури како пченица, ‘рж, пченка итн., или од култивирани растенија како елда, квиноја…

Бел или ‘ржан леб

И покрај тоа што белиот леб има високи пекарски квалитети, убаво нараснува и е многу вкусен, тој има најмалку натриум, калциум и фосфор за разлика од другите видови на леб. ’Ржаниот леб подолго време останува свеж, богат е со магнезиум и има два пати повеќе калиум отколку во белиот пченичен леб. Богат е со Б (Б1 и Б2) витамини. 

’Ржта е интересна житарка од еколошки аспект, покажувајќи ги своите предности во однос на приносот дури и при користење на екстремно мали количества хемиски средства, вклучувајќи ги пестицидите. Затоа, оваа житарка се нарекува „здрава житарка“. Друга предност на ‘ржта е нејзината отпорност кон мувли, така што прехранбените производи добиени од оваа житарка се сметаат како безбедни за консумирање.

Интегралното ‘ржано брашно се добива од целото зрно на житото ‘рж кое содржи вредни хранливи состојки коишто потекнуваат од лушпата на зрното. Токму затоа, брашното се одликува со:

Добри нутритивни својства

• Многу добар извор на хранливи материи – витамини и минерали неопходни за живот, и тоа: магнезиум, манган, селен, калиум, фосфор, цинк, железо, Б1, Б2, Б6, фолна киселина;
• Богатo е со диетални влакна, важни за нормално функционирање на дигестивниот систем;

Здравствени придобивки на ‘ржаното брашно

Може да помогне во  борба против:

• Дијабетес;
• Кардиоваскуларни болести;
• Воспаленија;
• Висок крвен притисок ;
• Лебот добиен од ’ржано брашно содржи помалку глутен во однос на лебот добиен од пченичното брашно;
• ‘Ржаниот леб има помалку калории во однос на лебот добиен од пченично брашно. 

Зрното содржи околу 11% белковини, кои се сиромашни со глутенин и лепило, па затоа лебот од ‘рж не нараснува и има потешка структура. Токму затоа, најчесто се комбинира со бело брашно во сооднос од 80% интегрално ржано брашно и 20% бело брашно. 

Низок гликемиски индекс

Лебот од ‘рж има низок гликемиски индекс (ГИ). Храната со низок ГИ, во текот на варењето побавно се разложува, со што побавно го подигнува нивото на гликоза во крвта, на тој начин овозможувајќи подолготрајно одржување на енергетското ниво. Храната со низок ГИ побрзо ќе ве засити и подолго ќе се чувствувате сити. 

Едно парче интегрален леб содржи калории колку едно јаболко

Едно парче ‘ржан леб содржи 83 калории и еден грам масти, коишто не се заситени масти. Исто така, едно парче содржи 2,7 г протеин и 0,91 мг железо. Земајќи ги во предвид овие бројки, лебот сам по себе не дебелее, туку она што со него се прави, односно изборот на додатоци и намази. Всушност, едно парче интегрален леб содржи калории колку едно јаболко.

Ќе се чувствувате посреќни

Според „Psychology Today“, јаглехидратите го зголемуваат нивото на серотонин, невротрансмитер кој влијае врз расположението и ја намалува потребата за слатко.

Обезбедува дигестивно здравје

Обезбедувањето на доволно диетални влакна помага за спречување на запек или други болести на органите за варење. Јадењето на храна богата со природен шеќер, скробна храна, како и леб, компири и ориз, може да помогне во намалување на срцевите болести. Просечно треба да се јаде најмалку по две парчиња леб на ден.  

За поубава кожа и коса

Верувале или не, убавината започнува од лебот. Лебот од интегрално брашно, изобилува со витамин Д и протеини.

За енергија

Јаглехидратите се примарен извор на енергија, потребна за вежбање, особено доколку вежбате вежби за издржливост и сила. Лебот којшто е направен од интегрално брашно, е одличен извор на железо, магнезиум и витамин Б – клучни елементи за одржување на нивото на енергија.