Сончевата светлина содржи ултравиолетови зраци, кои можат да му нанесат краткотрајна или долготрајна штета на вашето бебе
Летното сонце може да предизвика многу повеќе од неудобност и болка, ако претераме со изложување на истото. Значителните изгореници во детството може да предизвикаат развивање на рак на кожата подоцна во животот. Бебешката кожа е многу нежна и треба да биде правилно заштитена од сонцето.
Доенчињата во првите месеци од животот, па сè до шесттиот месец, најдобро е воопшто да не сè изложуваат на јако сонце (како она во летните месеци), во периодот од 11 до 17 часот. Нивната кожа е многу тенка, па затоа лесно „гори“. Кога ќе престојувате на плажа со вашето бебе, треба постојано да биде облечено во тенка памучна маичка, носејќи капа со штит. Седењето под “дебела” сенка или под чадор кој овозможува добро ладење, ќе спречи воспаление и оштетувања на кожата, но не и целосна заштита од ултравиолетовите зраци.
Секогаш употребувајте кремови за заштита од сонце, кои се специјално наменети за заштита на бебешка кожа. Половина час пред да излезете на сонце, намачкајте го целото тело на детето со видлив слој од заштитната крема. Користете препарати со SPF 25 кога не е многу јако сонцето и SPF 50 при посилно зрачење, кои се специјално наменети за бебиња и деца, но прво проверете дали имаат двојна UV заштита (UVA и UVB). Не заборавајте, доколку е времето облачно, неопходна е иста заштита, бидејќи UV зрачењето продира низ облаците. Денес, на пазарот постојат и нови производи кои имаат ознака IR, што значи заштита од инфрацрвени зраци, кои се одговорни за чувството на топлина. Овие производи се наменети за деца помали од две години, поради тоа што спречуваат прегревање и сончаница, која побрзо и полесно се појавува кај малите деца, поради сеуште незрелиот механизам за терморегулација.
Исто така треба да знаете дека ниедна заштита нема да спречи воспаление и оштетување на кожата, ако строго не ги применувате правилата на постепено сончање: Првиот ден – 10 минути, вториот ден – 20 минути, третиот ден – половина час, но цел час ќе се сончате кога кожата ќе стане поотпорна.
Облека за заштита од сонце
Капата е можеби првото нешто што ви доаѓа на ум, кога станува збор за заштита од сонцето. И во право сте да мислите така. Капата ја заштитува нежната кожа на лицето на бебето и го заштитува главчето од силното сонце чии зраци преку тенката кожичка на главчето и незатворените фонтанели продираат до обвивката на мозочето поради тоа што мекото ткиво на главата не е толку развиено како кај возрасен човек и поради тоа настанува сончаница проследена со температура и повраќање. Родителите не знаејќи ја вистинската причина за повраќањето и температурата, најчесто ја третираат како цревно заболување. Најдете капа која ќе му биде удобна на вашето бебе, за да не ја вади постојано. За да го заштитите телото на бебето, потребно е да му облечете маица. Маицата треба барем да биде со куси ракави, затоа што рамената се сончаат најбрзо кога се изложени на сонце.
Користете и дополнителна заштита за бебето, кога го изложувате на сонце. Постојат мали чадорчиња кои се прицврстуваат на количката, за да биде заштитено вашето најмило додека сте на прошетка. Можете да го менувате аголот на чадорчето за да ја заштитите максимално кожата на бебето. На плажа пазете да не го изложувате бебето на сонце, особено од 10 до 17 часот. Користете ги сите можни начини за да ја заштитите неговата нежна кожа. Дури и да е облачно, вие погрижете се вашето бебе да биде заштитено од ултравиолетовите зраци, кои продираат и преку облаците.
Значи, препорачливо е децата да се изложуваат на сонце, затоа што сончевите зраци го стимулираат претворањето на витаминот Д од неактивен во активен кој е потребен за развој на мускулно-скелетниот систем. Во нашето поднебје и на Балканот има најмногу сончеви денови, но и најголема појава на рахит кај децата, затоа што од патријархални побуди не се изложуваат на сонце, од причина да не настине, да не биде урочено и слично, додека пак во Скандинавските земји каде што има најмал број на сончеви денови, има помала појава на рахит кај децата бидејќи родителите се полиберални и почесто ги изнесуваат децата надвор.
Не дозволувајте детето да дехидрира
За оптимална хидратација, во текот на летото, потребно е бебињата и децата да пијат вода (не засладени пијалоци). Може да пијат вода колку што сакаат. Бебињата и малите деца, во летниот период, за разлика од возрасните, многу лесно ја губат течноста од организмот. Нивното тело, особено при подолго седење на сонце, може многу брзо да се прегрее и поради тоа постои ризик од топлотен удар.
Основни симптоми на дехидратација се:
- Кога плаче детето, нема солзи;
- Суви пелени подолг период (детето треба да мочка на секои три часа);
- Мачнини, повраќање, отежнати движења.
Основни симптоми за топлотен удар се:
- Умор, болки во стомакот и главоболка.
Прва помош за дехидрирано дете и дете што доживеало топлотен удар:
- Веднаш тргнете го од сонце и сместете го во разладена просторија;
- Освежете му го телото со вода и дајте му да пие вода;
- Ако детето е дезориентирано и конфузно, веднаш носете го на лекар, бидејќи ова може да биде тежок облик на топлотен удар кој е пратен со зголемување на телесната температура.
