Постои решение за сите „зафатени“ личности кои немаат време за себе, а сакаат да вежбаат, да имаат убаво оформено тело и да бидат во топ форма. Повеќе не мора да чувствувате грижа на совеста, бидејќи може да спортувате за време на рутинското чистење и средување на домот
Зафатените луѓе не секогаш имаат време во своите дневни агенди за да ги извежбаат препорачаните умерени кардиоваскуларни вежби неделно. Сепак, „немам време“ – не е изговор, бидејќи доколку се сака, сè се може. Нема да ви препорачувам да набавите некоја нова справа за вежбање што ќе ја користите како закачалка за алишта. Доколку сакате да водите здрав начин на живот, никогаш не смеете да наоѓате изговори, бидејќи како што може да се вежба за време на бременоста, така може да се вежба и кога се нема време. Имено, повеќето од домашните обврски се сметаат токму за кардиоваскуларни вежби со умерен интензитет.
Планирајте ги вашите домашни обврски според редослед кој ќе влијае на забрзување на отчукувањата на срцето, но и на развојот на главните мускулни групи.
Доколку сакате да вежбате, но се убедувате себе си дека немате доволно време или пак, би сакале некако да го зголемите и надополните сегашниот ваш програм за вежбање – одговорот може да го најдете во прашината на вашите комоди и полици или пак, во калта на вашиот автомобил. „Многу луѓе не сфаќаат дека може да вежбате за време на чистењето на својот дом или пак, чистејќи го автомобилот“ – вели Киана Том Kiana Tom од Sunset Beach, која е еден од водителите на ТВ емисијата „Оформување на телото“ – BodyShaping.
Каролин – Carolyn – Clean Momma е една од основачите на новиот начин на вежбање за време на досадните домашни обврски. „Пред да навлезам во деталите од моите вежби, треба да го спроведувате моето златно правило: Сè е во техниката и во ставот (држењето) на телото! Доколку не го применувате ова, тогаш само залудно си го губите времето… Доколку се придржувате кон ова правило, тогаш наједноставното движење го претворате во воодушевувачки резултати!“ – вели „Чиста Мама“. Оваа неверојатна домаќинка на својата официјална страница нуди многу варијанти на вежби со детални објаснувања, кои може да се прават за време на рутинските куќни задачи.
„Исчистете се додека чистите“ – гласи мотото на Clean Momma. Животниот стил што таа го промовира претставува комбинација на чистењето на домот, со чистењето на умот и телото. Таа дава решение за сите зафатени личности да го живеат животот во одлична форма. „Додека многумина од нас сакаат да се грижат за своето тело и за своето здравје, најчесто се случува да се нема време за тоа. Taskercise е уникатен режим на вежби, дизајниран специфично за зафатените луѓе. Мојата пасија е да им помагам на другите да се чувствуваат добро во своето тело. Јас потполно разбирам колку нашите животи можат да станат зафатени. Јас можам да ви помогнам да го максимизирате своето време со едноставни алатки и техники, кои можат да се вклопат во секој зафатен животен стил!“ – истакнува Каролин на нејзината страница.
Со ваков тип на вежби можете да ги зајакнете и оформите мускулите, да ги топите мастите, да добиете повеќе енергија, да го забрзате метаболизамот, а истовремено да ги завршите своите домашни обврски уште поисполнети и расположени, без грижа на совеста дека сте немале време да се посветите на себе си.
Бројот на потрошени калории за време на одредени активности е различен кај секоја индивидуа и се базира пред сè на тежината, интензитетот и времетраењето на активноста. Доколку не верувате дека рутинското чистење може да претставува дури и екстремен боди-билдерски тренинг, дознајте во просек колку калории трошите за еден час:
- Метење – 156 калории;
- Џогирање – 170 калории;
- Миење чинии – 88 калории;
- Правосмукање – 170 калории;
- Касапење – 340 калории;
- Готвење – 102 калории;
- Пеглање – 88 калории;
- Носење на испазарените намирници по скали – 442 калории;
- Наводнување на бавчата – 102 калории;
- Носење мали деца – 136 калории.
На следното видео е представена само една од вежбите… фатете се за работа и ослабете
