Новата орална вакцина која е наменета до ја превенира повторната појава на уринарна инфекција може да штити и до 9 години. Орална вакцина која е во форма на спреј со вкус на ананас, покажала висока ефикасност од 53.9% во превенција на повторувачки инфекции на уринарниот тракт во едно клиничко истражување.
Инфекциите на уринарниот тракт се најчести инфекции на мочниот меур и несразмерно повеќе ги зафаќаат жените отколку мажите. Од 40-60% од жените имале барем една епизода на инфекција на уринарниот тракт во текот на нивниот животен век и една од четири жени ќе е склона кон повторувачки инфекции. Овие инфекции најчесто се третираат со антибиотици но тоа доведува до антибиотска резистенција и ги прави антибиотиците неефикасни при повторна употреба.
Како алтернатива, истражувачите ја развиле MV140 вакцината, која содржи 4 инактивирани соеви на бактерии кои најчесто предизвикуваат уринарна инфекција. Оваа вакцина растворена и во форма на спреј се аплицира под јазикот по 3 пати дневно, поминува низ меката мукозна мембрана внатре во устата и ги стимулира лимфното ткиво како дел од имуниот систем.
Најновата клиничка студија, презентирана на 6 април на Конгресот на Европската Уролошка Асоцијација во Париз, е прва која покажа ефективност на долг рок на MV140 вакцината. Истражувачите имале увид во медицинските досиеја и редовно следеле 89 учесници во студијата кои ја примиле вакцината во 2014 година. Сите учесници имале историја на уринарна инфекција но биле без симптоми на истата во текот на 3 месеци кога се давала вакцината.
По завршувањето на третманот со спрејот, испитаниците биле без инфекција во просек по 54.7 месеци. Повеќе од половината во групата – 54% од жените и 53% од мажите – не добиле уринарна инфекција во текот на 9 години.
“Оние испитаници кои имале уринарна инфекција, истата ја добиле во блага форма и ја излечиле со пиење многу течности” – изјавил Bob Yang od Royal Berkshire Hospital во Велика Британија, коавтор на студијата.
Единствената замерка во врска со студијата, е големината на примерокот односно бројот на испитаниците. S. Adam Ramin од Urology Cancer Specialists во Калифорнија, истакнал дека половина од жените ќе добијат уринарна инфекција во текот на нивниот живот во споредба со 54% од жените во студијата кои добиле вакцина и избегнале уринарна инфекција во текот на години. “Ова може да влезе во рангот на незначајна разлика во толку мала популација”- рече тој.
Постоеле и претходно обиди да се направи вакцина за уринарни инфекции во форма на таблета. Но Yang истакнал дека сепак вакцина во форма на спреј е подобра опција и луѓето повеќе сакаат да користат спреј отколку таблети. Со тоа се постигнува подобра комплијанса а додатно помага и вкусот на спрејот на ананас што прави да луѓето заборават дека примаат лек. Исто така спрејот полесно се аплицира кај постари пациенти кои многу често знаат да имаат проблеми со голтањето на таблети.
Извор: https://www.newscientist.com/article/2426218-oral-vaccine-prevents-recurring-utis-for-nine-years/
