Затруени тројца малолетници од Скопје бидејќи не го почитувале означувањето на пијалокот
На 01.11.2016 тројца малолетници, две на возраст од 12 и едно на возраст од 11 години, од Скопје, се затруле од енергетски пијалок, за што објави МВР во вчерашниот билтен. Децата биле веднаш пренесени во Детската Клиника, каде било констатирано труење. Со симптоми на забрзана срцева реакција и треперење на рацете на седмоодделенците, веднаш по доаѓањето им била пружена здравствена нега.
Од Агенцијата за храна и ветеринарство, се огласија со соопштение дека производот „Симба“ кој во медиумите се посочува како причинител на труењето со храна на малолетните лица, е безалкохолен пијалак, на кој соодветно е означено дека не се препорачува за деца под 18 години и за бремени жени.
„Не станува збор за небезбеден производ, ниту за труење со храна, туку за непочитување на означувањето од страна на лицата кои го консумирале.“, стои во соопштението на АХВ.
Во тек е постапка од надлежните институции за тоа како овој пијалак дошол до малолетните лица.
Овој случај потврдува дека во Македонија нема голема контрола, ниту статистика колку се пие и колкава е возраста на оние кои пијат. Енергетските пијалаци се често консумирани од страна на малолетниците бидејќи содржат многу шеќер и изгледаат безопасно. Тие, во својот состав содржат кофеин и таурин кои имаат силно стимулатувно дејство и можат да нанесат штета врз детскиот организам доколку се консумираат во големи количини, па затоа на нив стои означување дека не се препорачуваат за деца под 18 години.
Нутриционистите истакнуваат дека овие, наизглед безопасни пијалаци се лажна енергетска бомба во организмот, бидејќи не додаваат енергија, туку го зголемуваат трошењето на внатрешната енергија во организмот.
Доколку се испијат повеќе лименки енергетски пијалок, може да доведат до несакани ефекти како забрзано срцебиење, зголемување на крвниот притисок, главоболки, мигрени, зголемена анксиозност, несоница, зависност, повраќање, како и поттикнување на ризично однесување кај тинејџерите.
