Дали знаете што е латерален епикондилитис?
Пвој болен синдром порано бил познат како болест на чистачи на прозорци. Но и „богатите“ можеле да заболат. Во минатото, еден моќен индустријалец, по долго убедување од семејството, отишол на доктор заради болки во лактот. Овој господин не го прифатил популарното име на својот болен синдром „латерален епикондилитис“ од срам пред своите колеги, па итриот доктор веднаш му го решил „големиот“ проблем и го нарекол синдром на тениски лакт. Во основа се работи за силни, монотони и репетитивни потези на мускулите кои го оптоваруваат латералниот епикондил како место на нивниот припој.
Анатомија
Зглобот на лактот е составен од три коски: надлактна коска (хумерус) и двете коски на подлактицата (радиус и улна). Постојат коскени испакнатини на дното на хумерусот наречени епикондили. Коскената испакнатина од надворешната страна (латерална страна) на лактот се нарекува страничен или латерален епикондил. На овој епикондил се припојуваат тетивни продолжетоци од мускули, со што ние можеме да ја движиме раката и да изведуваме одредени движења. Латералниот епикондилитис или тенискиот лакт се манифестира со блага до интензивна болка во проекција на надворешниот епикондил која може да биде присутна и подолго време.
Неодамнешните студии покажуваат дека тенискиот лакт често се должи на оштетување на специфични мускулни влакна на подлактицата, од прекумерно и постојано користење. Тетивата на екстензорот carpi radialis brevis (ECRB) помага во стабилизација зглобот кога лактот е исправен (екстендиран). Ова се случува за време на играње тенис. Кога тетивата е ослабена од прекумерна употреба, микроскопски пукнатини се формираат во истиот, односно на припојна точка на латералниот епикондил. Ова доведува подоцна до воспаление и болка.
Болката се јавува на местото каде тетивите на подлактицата се припојуваат за коскените нерамнини на надворешната страна на лактот.
Ризик фактори
Спортистите не се единствените луѓе кои може да добијат тениски лакт. Многу луѓе со тениски лакт учествуваат во работа или рекреативни активности кои бараат долготрајно и енергично користење на мускулот на подлактицата. Сликарите, водоводџиите и столарите се особено склони кон развој на тениски лакт. Повеќето луѓе се на возраст меѓу 30 и 50 години, иако секој може да добие тениски лакт ако ги исполнува факторите на ризик.
Симптоми
Симптомите на тенискиот лакт се развиваат постепено. Во повеќето случаи, болката започнува како блага, потоа полека влошувајќи се во текот на недели и месеци. Обично нема специфична повреда поврзана со почетокот на симптомите.
Вообичаени знаци и симптоми вклучуваат:
- Жаречка болка на надворешниот дел од лактот;
- Слаба сила на стисок.
Симптомите често се влошуваат со активност на подлактицата, како што се држење на предмет, вртење на клуч и сл. Најчесто погодена е доминантната рака; сепак, и двете раце можат да бидат засегнати, односно да има билатерална зафатеност.
Дијагноза
Многу фактори се разгледувани во утврдувањето на дијагнозата. Многу е важно да се знае кои активности предизвикуваат симптоми и каде точно се појавуваат симптомите. Дали претходно сте имале повреда на истиот лакт. Не смее да се занемари доколку била присутна историја на ревматоиден артритис или нервни заболувања.
Најпрво, се прават пасивни и активни тестови, со цел докторот да утврди кои мускули се афектирани.
Дијагностички тестови
Може да бидат препорачани и дополнителни тестови за да се отфрли други причини за вашиот проблем.
- РТГ – Поради тоа што овој тест дава одлична визуелизација на коски, може да биде ординиран за да се исклучи артритисот на лактот.
- МРИ – Доколку имате проблем со вратот, а болката се шири долж раката, може да биде направено МРИ скенирање. Магнетната резонанса покажува детали за меките ткива и ќе помогне да се види дали можеби станува збор за болка од вратната кичма, како спондилоза или нешто друго. Овие состојби знаат да дадат силна болка во рацете.
- Електромиографија (ЕМГ) – ЕМГ се прави кога треба да се исклучи компресијата на нервите. Многу нерви патуваат околу лактот, а симптомите на нервна компресија се многу слични на оние на тенискиот лакт.
Третман
Околу 80% до 95% од пациентите имаат успех со нехируршки третман.
- Oдмор. Првиот чекор кон закрепнување е да и дадете на вашата рака соодветно одмор. Ова значи дека ќе мора да престанете да учествувате во спортски или тешки работни активности неколку недели.
- Нестероидни антиинфламаторни лекови. Лековите како аспирин или ибупрофен ја намалуваат болката.
- Носење на стегач (ортоза). Користењето на стегач со силиконско перниче може да помогне во олеснувањето на симптомите на тенискиот лакт.
- Физикална терапија. Специфични вежби се корисни за зајакнување на мускулите на подлактицата.
- Стероидни инјекции. Стероиди, како што е кортизон, се многу ефикасни антиинфламаторни лекови. Стероидна инјекција се инјектира во болната област за да се ублажат симптомите.
Ако вашите симптоми не се намалат по 6 до 12 месеци на нехируршки третмани, вашиот лекар може да препорача оперативен третман.
- Рехабилитација. После операцијата, раката ќе биде привремено имобилизирана со сплинт. Околу 1 недела подоцна, сплинтот се отстранува. По отстранувањето на сплинтот, се започнува со вежби за истегнување и враќање на флексибилноста. Овој рехабилитационен период е клучен. Лесни, постепени вежби за зајакнување се започнуваат околу 2 месеци по операцијата.
Обично 4 до 6 месеци по операција се потребни за враќање на спортска активност. Операцијата на лактот се смета за успешна кај 80% до 90% од пациентите, што е одлична прогноза.
Нови начини на лекување
Плазма богата со тромбоцити (PRP) во моментов се истражува поради нејзината ефикасност во забрзувањето на зараснување на различни тетивни повреди. PRP се прави од сопствената крв на пациентот, по претходно нејзино центрифугирање и одвојување на тромбоцитите. Тромбоцитите содржат висока концентрација на протеини, наречени фактори на раст кои се многу важни при заздравувањето на повредите.
