Срце во кутија [ВИДЕО]

Ова вештачко срце во кутија може да ги реанимира срцата на луѓето кои неодамна умреле. Дали тоа значи дека можеме да живееме вечно?

Компанијата TransMedics го разви првиот досега комерцијален и пренослив систем OCS HEART за перфузија на топла крв, што овозможува нов тип на трансплантации на органи наречен „жива трансплантација на органи“. По смртта, срцето брзо oстанува без кислород и клетките на срцевиот мускул започнуваат да умираат. Со помош на новиот вештачки чувар на органи наречен „срце во кутија“, мртвото срце ја добива потребната доза на крв за да ја врати неговата енергија.

Досега трансплантираните срца потекнуваа исклучиво од донаторите со мртов мозок.

Практиката за трансплатација подразбира дека срцата се отстрануваат од донаторите и се транспортираат на многу ниски температури. Системот за грижа на органите Organ Care System на компанијата TransMedics , ги одржува органите во жива состојба пред да бидат трансплантирани. Покрај „срцето во кутија“ фирмата има развиено уред што ги одржува белите дробови, како и црниот дроб и бубрезите.

Уредот пумпа топла крв збогатена со кислород и хранливи состојки низ оживеаниот орган.

Тој исто така се грижи за соодветната температура и влажност, со што претставува средина најблиска до нормалната. На страницата на производителот на „срцето во кутија“, објаснето е дека целта на ова медицинско помагало е да се надминат недостатоците на студениот начин на чување на срцата за трансплантација.  Со овој уред се зголемува времето што органот наменет за трансплантација може да го издржи надвор од телото во состојба погодна за трансплантација.

Хирурзите на овој начин имаат можност да ја оценат функцијата на органот надвор од телото на донаторот. Уредот овозможува оживување на срцето и потенцијално подобрување на неговата функција по вадењето од донаторот. Досега ова вештачко срце е успешно употребено кај повеќе од 15 трансплантации на срце. Во комерцијална употреба, срцето OCS е достапно во Европа и Австралија, и е во клиничка употреба во водечките центри. Во САД овој систем сè уште не е достапен за комерцијална употреба, бидејќи е клинички истражуван.