Нежната и чувствителна кожа на бебињата може да се иритира заради алергиска реакција на различните видови на пелени, нивните мириси и бои
Пеленскиот осип е честа појава кај бебињата што може да ја зацрвени и иритира бебешката кожа. Вообичаено пеленскиот осип не претставува опасен проблем, но предизвикува непријатност на нежната бебешка кожа. Тој може да биде последица на повеќе состојби. Прочитајте ги можните причини за појава на пеленски осип, како и совети за заштита на нежната бебешка кожа.
Причини за појава на пеленски осип
Иритација
Кожата на бебето може да се иритира или зацрвени доколку пелената не се промени подолг период и притоа урината и/или изметот останат долго на бебешката кожа.
Инфекција
Урината ја менува pH вредноста на кожата, а тоа им овозможува на бактериите и габите побрзо да растат. Исто така, материите содржани во пелените што го спречуваат протекувањето на урината ја оневозможуваат и циркулацијата на воздухот со што се создава топла атмосфера во која габите и бактериите полеснo се размножуваат.
Алергија
Нежната и чувствителна кожа на бебињата може да се иритира заради алергиска реакција на различните видови на пелени, нивните мириси и бои.
Совети за заштита на бебешката кожа од пеленски осип
Пеленскиот осип вообичаено се губи по само неколку денови. Покрај основните совети за како да ја излечите бебешката кожа во случај на иритација, инфекција или алергија заради пеленски осип, она на што треба да внимавате е:
Правилно бришење
Без разлика дали практикувате бришење на бебешкото газе со влажна крпа, влажни бебешки марамчиња или памук, она на што треба да внимавате е правецот на бришење. Секојпат бришете го бебето од напред кон назад, со цел спречување на ширење на бактериите што може да предизвикаат инфекции на кожата. Освен предниот и задниот дел, не заборавајте да ја избришете и внатрешноста на нозете на бебето. Откако целосно ќе го избришете бебето со мокра крпа, избришете го уште еднаш со сува и потоа нанесете соодветен крем.
Совети за правилна употреба на различните типови на пелени
Пелени за еднократна употреба
- менувајте ги пелените неколку пати во текот на денот;
- секојдневно празнете ја корпата за отпадоци за да избегнете ширење на бактериите;
- доколку забележите белези од пелените на нозете и половината на бебето тоа значи дека треба да ја проверите големината на пелените и полесно да ги поставувате пелените;
- доколку забележите црвенило на кожата по промена на брендот на пелени, задолжително сменете ги пелените;
- секогаш мијте ги рацете по промена на пелената на бебето за да избегнете ширење на бактерии.
Платнени пелени
- менувајте ги пелените неколку пати во денот;
- испразнете ги пелените пред да ги ставите во машината за перење;
- перете ги пелените без други парчиња облека во машината;
- користете благ прашок и омекнувач за облека;
- секогаш мијте ги рацете по промена на пелената на бебето за да избегнете ширење на бактерии.
