Подгответе ја вашата кожа за плажа со вистински избор на храна (храна со омега 3, антиоксиданси, витамин Д и А)
Оштетувањата на кожата од УВ зраците кај прекумерното изложување на сонце со текот на годините може да остават несакани траги. Така, соодветната подготовка на кожата е многу важна. Средствата за заштита на кожата од сонце штитат од оштетување на кожата и нејзино стареење. Сепак, секогаш имајте на ум дека и исхраната е дел од подготовката пред изложување на сонце. Правилната исхрана ќе ве заштити од слободните радикали коишто ги уништуваат колагенот и еластинот, двете најважни компоненти на здравата кожа.
Храната којашто изобилува со витамин А, антиоксиданси и омега 3, освен што ослободува од слободните радикали делува и како природен заштитен филтер. Воедно, ваквата храна на тенот му дава нежно златна нијанса.
Важно е да внесуваме продукти како моркови, спанаќ, кајсии, домати, лубеница, тиква, бидејќи тие содржат бета каротен (провитамин А). Овој антиоксиданс ја заштитува кожата од штетното УВ зрачење преку врзувањето на т.н. слободни радикали.
Здрави грицки за на плажа
Микс од сушено овошје и јаткасти плодови
Долгите летни денови едноставно не се создадени за „тешка“ и мрсна храна. Тоа не значи дека треба да се заситувате со секакви грицки. Како идеални грицки за на плажа, за коишто не ви е потребен фрижидер, изберете сушено овошје, или микс од сушено овошје и јаткасти плодови. Сушеното овошје содржи железо и претставува идеален антиоксидантен коктел со витамини и бета каротен, кој се бори против слободните радикали. Содржи многу хранливи влакна и е одличен извор на антиоксиданси, особено полифеноли.
Нутриционистите советуваат сушеното овошје да се јаде за појадок или за ужина бидејќи го потпомогнува варењето.
Гоџи бобинки
Таканаречените „среќни бобинки“ или „црвени дијаманти“ се корисни за целиот организам. Овој плод се смета за најголем извор на железо што може да го поседува една билка. Поседува повеќе витамин Ц од портокалот. Гоџи бобинките содржат и витамин Е, кој ретко може да се најде во овошјето. Витаминот Е ги штити клетките од слободните радикали, кои се поврзуваат со појавата на рак.
Тие се богати се со антиоксиданси од кои најзначајни се витамините Ц, Е и Б комплекс, цинк, бета каротен, кој придонесува за здрав изглед на кожата. Така што, се препорачува да ги додадете на вашето дневно мени, особено во лето.
Ленено семе
Лененото семе е многу корисно против воспаленија. Тоа изобилува со омега-3 масни киселини коишто делуваат антивоспалително, богато е со есенцијални масла и многу витамини, кои помагаат за здрава кожа. Додајте лажица свежо сомелено ленено семе во вашето утринско смути, чијашто основа ќе му бидат свежите производи.
Здраво уживајте во летните денови и искористете ги благодетите од сонцето.
