Проценките се дека од ова заболување страдаат околу 12 % од популацијата. Болеста се јавува подеднакво кај двата пола, на која било возраст
Синдромот на немирни нозе (Restless Legs Syndrome – RLS) е сензо-моторно невролошко заболување кое значајно го нарушува процесот на спиење. Се карактеризира со непријатно чувство во нозете и неконтролирана потреба за придвижување на истите при мирување, со желба да се ослободи од тие непријатни сензации кои се разликуваат по интензитет од лесни чувства на дискомфорт до интензивни болни сензации.
Специфична одлика на ова заболување е појавата на потешкотии при лежење, односно подолго мирување. Така ова нарушување го засега и го нарушува спиењето, односно сонот на пациентот, што долгорочно го исцрпува и омалаксува. Тегобите се поретки во текот на денот, а поизразени навечер, особено при почетокот на сонот. Рано наутро, повеќето пациенти немаат тегоби, па затоа единствено тогаш имаат поквалитетен сон.
Проценките се дека од ова заболување страдаат околу 12 % од популацијата. Болеста се јавува подеднакво кај двата пола, на која било возраст. Потешките симптоматски форми на болеста се јавуваат почесто на средна возраст.
Причините за RLS во најголемиот број случаи се непознати поради што се означува и како идиопатски RLS. Кај 50% од пациентите постои позитивна фамилијарна анамнеза за RLS, што укажува на одредена генетска причина.
Постојат и секундарни форми на RLS:
- кај пациенти со ниско серумско железо (ниска концетрација на феритин), односно анемија. Со корекција на нивото на железо се повлекуваат и симптомите;
- при хронична бубрежна слабост, шеќерна болест, Паркинсонова болест, периферна невропатија …
- при бременост (особено во текот на последното тримесечје);
- RLS може да биде провоцирана и од некои лекови како: лекови против повраќање, анти-епилептици, антипсихотици, антиалергици и др.
Исто така, кофеинот, алкохолот и никотинот може да провоцираат тегоби кај индивидуи кои имаат склоност.
Д-р Васко Даниловски, специјалист невролог
