Кај некои луѓе алергиската реакција на животни може да предизвика напрегнато и отежнато дишење, како и појава на астма
Алергијата на животни всушност претставува алергиска реакција на протеините што се содржани во кожните клетки, влакната и крзното, плунката и урината на животните. Првите знаци и симптоми за појава на алергија на животни се оние коишто се вообичаени за алергиски ринитис, односно кивање, затнат нос и течење на секрет од носот. Кај некои луѓе, алергиската реакција на животни може да предизвика напрегнато и отежнато дишење, како и појава на астма.
Знаци и симптоми при појава на алергија на животни:
- Зацрвенети и надразнети очи;
- Кивавица;
- Течење на носот;
- Затнат нос;
- Чешање на носот и грлото;
- Кашлање;
- Често будење;
- Отечена и помодрена кожа под очите;
- Притисок и болка во главата и лицето;
- Отежнато дишење;
- Стегање и болка во градите;
- Бревтање и свирење при дишењето;
- Дерматит;
- Црвенило и иритација на кожата;
- Егзема.
Типови на алергии на животни
Најчестите алергии се на животни што вообичаено се чуваат како домашни миленичиња: мачка, куче, зајак, хрчак, морско прасе и сл. Алергиите на животни ретко се предизвикани од животни што не се митарат, односно што немаат влакна и крзно коешто се менува.
Алергија на мачка и куче
Алергените од мачките и кучињата се содржани во нивните влакна, плунката, урината и потта. Кога мачките и кучињата се митарат, алергените многу лесно се пренесуваат преку воздухот и се лепат на гарнитурата и килимите во домот, како и на облеката. Исто така, плунката, потта и остатоци од урината на кучињата и мачките може да останат на облеката, постелнината, килимите и мебелот во домот.
Алергија на зајак и други глодари
Алергените од животните од семејството глодари: зајци, глувци, хрчаци и морски прасиња, исто така се содржани во нивните влакна, плунката и урината. Правот што се собира во леглото на овие животни исто така може да допринесе за пренесувањето на нивните алергени низ воздухот и за појава на алергија.
Причини за појава на алергија
Имуниот систем произведува протеини познати како антитела коишто нè заштитуваат од непосакувани материи и непознати тела коишто може да предизвикаат инфекција или алергија. Алергиските реакции се појавуваат кога имуниот систем реагира на туѓите тела и супстанции како што се поленот, мувлата или животински влакна. Имуниот систем произведува антитела коишто го идентификуваат конкретниот алерген како нешто штетно и го напаѓаат. Оттука, кога го вдишуваме тој алерген или доаѓаме во контакт со него, нашиот имунолошки систем одговара со инфламација на назалните или дишните патишта. Продолжената изложеност на алергенот може да предизвика и пролонгирано воспаление што може да доведе и до појава на астма.
Кога да побарате помош од лекар
Повеќето знаци и симптоми при појава на алергија на животни се слични на оние на вообичаена настинка. Понекогаш е тешко да се направи разлика дали се работи за обична настинка или пак за алергиска реакција, но доколку симптомите траат повеќе од две недели и се придружени со невообичаени реакции на кожата, имајте предвид дека е можно да станува збор за алергија и консултирајте се со вашиот лекар.
