Прва помош при покачена температура кај децата

Кога детето да се однесе на лекар

Покачената температура обично е првиот аларм за родителите и причина за сериозна загриженост. Сепак, во интерес на здравјето на детето, многу е важно родителите да разберат дека покачената температура е одбранбен механизам на човечкиот организам и соодветно да реагираат. Покачената температура, е симптом на болест кој, подразбира имунитетски одговор и борба со причинителот (вируси, бактерии итн.) и притоа доколку не надминува 38 – 38,5°C е корисна и не треба да се симнува со лекови (антипиретици) бидејќи на овој начин од една страна се развива имунитетот, а од друга страна некои патогени не можат да опстанат на висока температура и се уништуваат.

Сепак не треба да се заборави на опасностите кои ги носи високата температура кај малите деца а пред се дехидратацијата како и опасноста од појава на фебрилни конвулзии – грчеви кои се појавуваат кај некои деца со покачена температура, поради незрелост на централниот нервен систем.

Прва помош при покачена температура кај децата?

• Зачестен мониторинг на температурата на детето (на 15-30 минути) и контрола на појава на други симптоми (течење на нос, кашлање, пролив, повраќање, исфрлање на кожата)
• Зголемете го внесот на течности (супи, чаеви, сокови) ,а кај бебињата кои цицаат да се зголеми бројот на подои за да се намали опасноста од дехидратација. При повисока температура од 38,5°C корисно е да се вклучат и раствори со орални рехидратациски соли (ОРС) кои ќе ги надоместат изгубените електролити. Доколку нема стомачни тегоби, исхраната треба да биде нормална.
• Остранете ја го од детето вишокот на облека и намалете ја температурата во просторијата (20-23°C).
• Често туширајте го детето со млака вода (32-33°C) и повремено разладувајте му ја кожата го со крпа натопена со млака вода.
• Доколку температурата надминува 38-38,5°C и не се симнува со разладување дадете антипиретик (парацетамол, ибупрофен). При тоа внимавајте дозата да биде соодветна на возраста и тежината на детето а фреквенцијата на давање да биде според упатството (на секои 4-6 часа доколку е сеуште покачена температурата).

Кога детето да се однесе на лекар?

• Доколку бебето е помало од 3 месеци има температура над 38°C. Кај бебињата болеста може брзо да се развие и да добие непосакуван тек.
• Доколку бебето има од 3-12 месеци и има температура над 39°C.
• Доколку детето има под 2 години и не успевате да ја намалите температрата со лекови повеќе од 48 часа.
• Доколку детето има температура над 40°C која не успевате да ја контролирате со лекови.
• Во случаи на дехидратација: детето плаче без солзи или ретко и малку мокри а мочта има портокалова боја а кај бебињата доколку нема мокра пелена во период од 8 часа.
• Доколку детето има сериозни симптоми на болки во грлото, увото, пролив, повраќање, кашлица кои перзистираат повеќе од 48часа.

Доколку детето тешко се буди, блада или губи свест како и во случај на фебрилни конвулзии (контракции на скелетната мускулатура на целото тело, вкочанет поглед губење на свест) веднаш повикајте итна помош!