Доколку знаете како да постапите при појава на изгореници, ќе ја намалите болката и ќе спречите создавање на лузни
Изгорениците се едни од најчестите незгоди во домот. Тие се честа повреда кај децата и можат да се добијат на различни начини. Кај помали деца, најчесто станува збор за изгореници добиени при допир со жежок предмет (пегла, рерна, рингла) или течност и затоа најчесто се појавуваат во пределот на раката, односно дланката. Најдобра заштита од изгореници секогаш е превенцијата, односно размислување однапред за сите ситуации кои што може да му се случат на децата. Според статистиките, скоро 75 проценти од изгорениците кај децата можат да се спречат. Децата од претшколска возраст никогаш не ги оставајте сами и никако без надзор во кујната. Голема опасност претставува и плинскиот шпорет, бидејќи детето може директно да дојде во допир со отворен оган. Исто така, секој врел напиток треба да биде вон нивниот дофат.
Доколку сепак дојде до изгореници, најважно е ладење на повредениот дел. Неопходно е зафатениот дел да се стави под млаз ладна вода или да се нанесе ладна облога во првиот час, со цел да се намали температурата. Откако местото ќе се излади, кожата треба да се измазни, за да не останат трајни лузни. Затоа се препорачува да се користат средства кои ќе го поддржуваат природното потење и на тој начин ќе создадат смирувачки дејство и ефект на ладење. Неопходно е повреденото место да се одржува чисто, со цел да се спречат инфекции. Затоа, добар избор се антибиотиците со локално дејство. Избегнувајте ги народните методи на мачкање на местото со паста за заби, брашно или масло.
За раната од изгореници да зарасне на најдобар можен начин, најважно е да делувате колку што може побрзо.
Затоа, погрижете се секогаш во вашата домашна аптека да има соодветни производи за третирање на изгореници. При лечење на изгореници потребно е трпение и процесот на заздравување е постепен, но со соодветна грижа и нега, успешно се лечат.
Кои видови изгореници може да се третираат во домашни услови
Изгорениците можат да бидат од различен степен, и тоа, прв, втор и трет.
Прв степен – црвенило, местото е болно и малко отечено, а зафатени се само горните слоеви на кожата. Отеченото место станува бело на допир, но не се создаваат пликови.
Втор степен – се формираат пликови и раната е болна. Повредата е подлабоко во ткивото.
Трет степен – станува збор за големо оштетување од изгореници и нема болка бидејќи нервните завршетоци се уништени. Во некои случаи, дури и неколку денови после повредата, тешко е да се разликуваат длабоки изгореници од втор и трет степен.
При површински изгореници од прв степен и во некои полесни случаи од втор степен, површинскиот слој на кожата брзо се обновува, па затоа овие изгореници може да се лекуваат во домашни услови. Во зависност од сериозноста на изгореници од втор степен, задолжителна е консултација од лекар.
НАПОМЕНА: Дадените препораки не се замена за лекарски совет и третман.
