Летниот период е особено ризичеан за појава на вагинални инфекции
Вагиналните инфекции се честа појава кај женската популација особено во летниот период. Причинителите се најчесто од бактериска или габична природа и обично се лечат со антибиотици и антимикотици. Сепак појавата на чести рецидиви резултира со повторување на антимикробната терапија што само посебе носи и несакани дејства како и појава на антибиотска резистенција. Затоа се повеќе се вртиме кон природата и алтернативни и/или адјувантни решенија за спречување на вагиналните инфекции.
Притоа треба да имаме во предвид дека во основата на најголем број вагинални инфекции стои нарушување на нормалната вагинална микрoфлора и покачување на pH средината над 4.5. Кога киселоста на вагината ќе се намали и ќе се намали бројот на добрите микроорганизми, тогаш почнуваат да се јавуваат тегоби кои се карактеристични за вагиналните инфекции: зголемена вагинална секреција, непријатна миризба, печење, црвенило и чешање на надворешните гениталии, често мокрење, болни и непријатни сексуални односи и др.
Затоа кај жените е особено важно да се одржуваат концентрациите на млечно-киселински бактерии и млечна киселина во вагината.
Ова најуспешно се постигнува со локална апликација на вагинални препарати на база на пробиотици-лактобацили (L.Acidophillus) и млечна киселина. Пробиотиците ја обновуваат вагиналната микрофлора, ја инхибираат колонизацијата на патогени и го намалува pH на средината.
Млечната киселина ја враќа природната кисела pH на вагиналната слузница, со што ги инхибира патогените соеви и го чува интегритетот на цервиксот. Кај жените во менопауза корисни се и изофлавони од соја бидејќи ги намалуваат симптомите на атрофија: сврбеж, болка и еритем. Овие вагинални препарати е најсоодветно да се веднаш по престанување на циклусот во период до 14 дена.
Во случај на неуспех од терапијата обратете се на вашиот матичен гинеколог.
М-р фарм, Јулијана Златева
