Ослободете се од запекот на природен начин
Еден од најчестите дигестивни проблеми кој секој го има барем еднаш во животот е проблемот со тврда столица, а доста често се јавува и опстипација или народно познато како запек. Што претставува всушност опстипацијата? Тоа е состојба која се јавува кога подвижноста на цревата се намалува, столицата станува сува и тврда и тоа го отежнува празнењето на цревата. Имаме нередовно, нецелосно и тешко празнење цревата, појава на подуеност и стомачни болки. Причините може да бидат следните:
- Стеснување или блокада на дебелото црево, особено на ректумот (завршниот дел од дебелото црево) што оневозможува нормален премин на фецесот;
- Намалување на целокупната цревна перисталтика што исто така го забавува движењето на столицата;
- Зголемена дехидрација на столицата во дебелото црево при што таа станува тврда маса чие отстранување е отежнато;
- Психосоматска опстипација поврзана со анксиозни состојби и стрес;
- Недоволна физичка активност;
- Внесување на премалку течности и растителни влакна во исхраната при што не се создава столица со нормална конзистенција.
Токму последново е најчестата причина за тврда столица и запек кај најголем дел од луѓето. Се внесува секојдневно брза храна, недоволно течна храна и премалку вода. Ова е сигурен рецепт за појава на тврда столица која ќе предизвика проблеми при дефекација и на крајот опстипација.
Решението за избегнување и лекување на оваа појава е повторно поврзано со храната.
Редовната конзумација на многу житарици, овошје и зеленчук особено оние богати со хранливи влакна е добредојдена. Најчесто се препорачуваат јаболкото, сливата, смоквите, лененото семе, ананас, папаја, бадеми. Кога проблемот веќе постои, од исхраната целосно да се исфрлат бели печива, млеко, банани, колачи, чоколади како и чаеви кои содржат доста танини бидејќи тие ја намалуваат подвижноста на цревата и предизвикуваат тврда столица.
Физичката активност ја подобрува цревната перисталтика, како и работата на целиот дигестивен систем, па така ќе допринесе за превенција на отежнатата дефекација и опстипација.
За брзо отстранување на запекот и воспоставување на нормален режим на празнење на цревата постојат ефикасни и сигурни природни препарати. Такви примери се лактулозата и крушината, чија комбинација претставува сигурно и ефикасно решение против тврда стилца и опстипација без несакани ефекти.
Лактулозата е всушност шеќер (дисахарид) која при доаѓањето во дебелото црево се разградува од страна на бактериите на цревната микрофлора до органски киселини со мала молекулска маса. Притоа тие делуваат осмотски т.е предизвикуваат зголемување на секрецијата на вода во луменот на тенкото и дебелото црево и со тоа зголемување на цревната содржина.
Екстрактот од кора од крушина делува преку 2 механизма:
- Контактна стимулација на мотилитетот на дебелото црево (со стимулација на неуроните, се поттикнува мотилитетот);
- Го регулира процесот на секреција, спречува апсорпција на вода и електролити (антиапсорптивен ефект) и ја засилува пропустливоста на меѓуклеточните врски, што ја зголемува секрецијата на вода во луменот на цревата.
Ваквата комбинација може да се најде во облик на прашок кој се раствора во вода и се пие свежо подготвен. Поволен ефект се постигнува со еднократна примена на ден, без појава на стомачни грчеви, а природните состојки не предизвикуваат навикнување и можат да се користат подолг временски период.
М-р фарм. Лидија Николоска Пешталеска
