Пилешко и зеленчук на пареа

Искористете ги хранливите вредности на зеленчукот и месото, со тоа што ќе ги приготвите на пареа 

Денес, ви подготвивме пилешки стек со моркови и брокули, зготвени на пареа. Овој рецепт е многу лесен и едноставен за подготвување, а многу вкусен. Може да го направите со зеленчук по желба и да пробате со разни видови на зеленчуци, (на пример, цвекло и тиквици ) сè додека не ја добиете вашата добитна комбинација.

Наједноставно се приготвува на рерна на пареа, но сосема добро излегува и со обична рерна, само ви треба тавче со решетка и капак.  Налејте вода во тавчето, ставете ја решетката, врз неа наредете го белото месо (ако сакате можете да го исечете на помали парчиња, ако не, ставете го цело), па морковите исечени на четвртинки, посолете, побиберете, ставете неколку гранчиња свеж магдонос. Сето ова, затворете го со капак и ставете го во загреана рерна на 250°C, да се готви околу половина час. Повремено проверувајте ја водата под решетката, ако испари дотурете зовриена. Кога месото ќе биде скоро готово, ставете ги брокулите исечени на парчиња, вратете го капакот и оставете го тавчето во рерна уште 10-тина минути.

Приготвено на овој начин, месото станува меко, а зеленчукот зготвен, но сепак не преварен.

Како додаток на ова јадење, може да приготвите сос од бамји, патлиџани и пченка, кој што ќе го направите на следниов начин: на 2 лажици путер испржете еден кромид, исечен на тенки резанки, малку да омекне. Додадете 1-2 шолји бамји, исецкани на половинки или третинки. После 5-6 минути додадете 2-3 средни патлиџани, исецкани, 1 лажиче сол, 1/2 лажиче црвен пипер и 1/2 лажиче кари. Сè заедно, пржете на тивко околу 10 минути, потоа додадете 1 шолја замрзната пченка и мешајте додека пченката не се стопли.

* рецептите со во целост превземени од ситно сецкано