Останете здрави и во форма и овој Велигден

Следниве совети ќе ви помогнат да не заборавите на здравјето и да го прославите Велигден на здрав начин

Секој од нас ги користи празниците како изговор за прескокнување на здравите оброци и физичките активности. Без разлика дали станува збор за Божиќ, Бадник или Велигден, секој празник претставува период кога ни е „дозволено“ да бидеме мрзеливи и да јадеме не-толку-здрава-храна. Велигден е празникот кога во секој дом се спрема богата традиционална трпеза околу која се собира семејството да сподели среќни моменти.

Велигденските пости коишто траат до 40 денови престануваат токму во денот недела кога посното мени се заменува со раскошна трпеза сочинета од месо, јајца, бел леб, колачи и алкохолни пијалаци. Периодот околу Велигден вообичаено е сличен на оној околу останатите големи празници за време на кои секој сака да ужива во вкусните јадења на домашната трпеза, заборавајќи да внимава на своето здравје и форма. Следниве совети ќе ви помогнат да не заборавите на здравјето и да го прославите Велигден на здрав начин.

Одберете здрави рецепти

Обидете се овојпат да не го користите празникот како изговор за да јадете тешка храна и да пиете алкохол во големи количини. Постојат многу начини на готвење на храната со кои може да ги редуцирате мастите и јаглехидратите.

Не претерувајте со јадење и пиење

Освен што ќе одберете рецепти за приготвување на празничната трпеза на здрав начин, потрудете се да јадете и пиете умерено. Не паѓајте во замката наречена „празнично прејадување“ и за празникот јадете како што јадете вообичаено за ручек и вечера.

Не го прескокнувајте вежбањето

Велигден не треба да биде и празникот за време на кој ќе заборавите на физичката активност и ќе лежите дојадувајќи ја храната што останала од главната трпеза. Посетете ја теретаната или студиото во коешто вежбате, станете порано наутро и истрчајте половина час за да се вратите во форма и да се чувствувате подобро.

Релаксирајте се и уживајте во слободното време

За време на празникот ослободете се од стресот и уживајте во слободното време со тоа што ќе се прошетате со пријателите или најблиските. Не се затворајте во домот, подготвувајќи се за големата велигденска вечера бидејќи празникот е ден во годината во кој можете да уживате, да се одморите и да се наполните со енергија.