novo-istrazhuvanje-pokazhuva-deka-vezhbanjeto-mozhe-da-ve-zashtiti-od-glaukom_image
Споделете со пријателите!

Во 2013 година бројот на лица на возраст од 40 до 80 години што боледувале од глауком изнесувал 64,3 милиони.
Нови истражувања покажаа дека физичката активност, особено онаа со умерен и висок интензитет, како што е брзото одење или трчањето може да помогне во намалувањето на ризикот за заболување од глауком, прогресивна болест на очите.

Во светот, глаукомот е водечка причина за развој на слепило. Истражувачите во новата студија проценуваат дека во 2013 година бројот на лица на возраст од 40 до 80 години што боледувале од глауком изнесувал 64,3 милиони. Овој број е предвиден да се зголеми на 111,8 милиони до 2040 година.

Лекот за глаукомот сè уште не е пронајден, но доколку болеста е дијагностицирана порано постојат третмани за нејзино лекување. Меѓудругото тие вклучуваат капки кои можат да ја забават прогресијата и да го зачуваат видот.

Тимот истражувачи од Универзитетот во Калифорнија, Лос Анџелес, своите нови истражувачки наоди ги претстави на одржувањето на Американската академија за офталмологија во Њу Орлеанс. Користејќи податоци собрани при истражување спроведено на територијата на САД, истражувачите откриле дека физички најактивните луѓе се чини дека имаат 73 отсто помал ризик за развој на глауком во споредба оние што се најмалку активни.

Глаукомот е болест што може да се развие кај било кој пол и раса, но сепак постојат одредени групи на луѓе кај коишто е забележан поголем ризик за заболување. При истражувањето се докажало дека во САД глаукомот е болест што почесто се појавува кај афроамериканците на возраст над 40 години, кај сите луѓе на возраст од 60 и повеќе години со историја на болеста во кругот на семејството и кај луѓето што боледуваат од дијабетес.

Контролирање на крвниот притисок, одржување на здрава телесна тежина и практикување физичка активност може да помогнат во намалувањето на ризикот за губење на видот како последица од глауком. Овие работи, исто така, помагаат во намалувањето на ризикот за заболување од дијабетес, како и од други состојби кои се поврзани со развојот на оваа болест на очите.

Прочитајте:  Кога треба да го прескокнете тренингот

Во новата студија истражувачите забележале дека практикувањето на умерена или интензивна физичка активност, како што се брзото одење и трчањето во времетраење од 30 минути во најмалку 5 дена од неделата е еднакво на правење најмалку 7.000 чекори дневно секој ден од неделата. Кога ги анализирале податоците, тимот открил дека ризикот за заволување од глаукома се намалува за 25 отсто на секое зголемување на неделното вежбање за 10 минути.

„Нашите истражувања сугерираат дека не е само вежбањето круцијално за намалување на ризикот за заболување од глауком, туку и дека луѓето коишто вежбаат подолго и со поголем интензитет уште повеќе можат да го спречат појавувањето на болеста во споредба со оние што вежбаат пократко и со помал интензитет“, вели тимот истражувачи од Универзитетот во Калифорнија.

Сепак, тие истакнуваат дека директната врска помеѓу глаукомот и физичката активност треба дополнително и подетално да се анализира. Во меѓувреме тие советуваат редовно да се вежба, бидејќи физичките активности влијаат позитивно не само на здравјето на очите, туку на целокупното здравје.


Споделете со пријателите!