Клучното прашање е дали мозоците на глувците и вештачката Алцхајмерова болест на која тимот истражувачи ги изложил, се доволно слични на човечките за резултатите да бидат медицински значајни
Клучот за враќање на сеќавањата што исчезнуваат како последица на Алцхајмеровата болест би можела да биде употребата на ласери за активирање на одредени неврони во мозокот. Ако ова истражување спроведено на глувци може да се примени кај луѓето, тоа би можело да им помогне на милиони кои страдаат од оваа болест.
Група научници од Универзитетот Колумбија во една студија објавена во списанието „Hippocampus“ откриваат дека сеќавањата кај глувци со Алцхајмерова болест може да се обноват оптогенетски, односно со употреба на светла. Ова е податок што може да ја промени нашата перцепција за болеста од идејата дека ги уништува сеќавањата до концептот дека е можно едноставно да ги нарушува механизмите за навраќање на истите.
Резултатите биле собрани преку испитување за кое било извршено споредување на здрави глувци со глувци со болест слична на Алцхајмеровата болест. Најпрво, делови од мозоците на глувците биле конструирани да светат жолто за време на складирањето на сеќавањата и црвено за време на навраќањето на истите. Потоа глувците биле изложени на мирис на лимон проследен со електричен шок – поврзувајќи ги двата типови сеќавања.
По една недела глувците повторно биле изложени на мирисот на лимон: црвениот и жолтиот сјај кај здрави глувци се преклопиле и тие изразиле страв, покажувајќи дека пристапувале до вистинските сеќавања. Сепак, мозокот на оние со Алцхајмеровата болест сјаел во различни области, а болните глувци биле индиферентни, покажувајќи дека се сеќаваат со погрешните делови на мозокот.
Оваа студија би можела да го револуционира истражувањето и третманот на Алцхајмеровата болест, помагајќи им милиони луѓе коишто страдаат од оваа болест. Ралф Мартинс од Универзитетот „Edith Cowan“ во Австралија, за „New Scientist“ изјавил дека има потенцијал да поттикне развој на нови лекови за да помогне во враќањето на сеќавањата.
Сепак, клучното прашање е дали мозоците на глувците и вештачката Алцхајмерова болест на која тимот истражувачи ги изложил, се доволно слични на човечките за резултатите да бидат медицински значајни. Имено, луѓето што боледуваат од Алцхајмеровата болест губат повеќе неврони отколку глувците, и оттука, би било тешко да се таргетираат специфичните сеќавања, бидејќи човечкиот мозок е далеку посложен од оној на глувците.
Иако мора да се направат понатамошни студии, овие наоди се ветувачки во истражувањето на Алцхајмеровата болест.
