Овој уред е дизајниран да им помогне на пациентите со инфекција на синусите и со хроничен синузитис
Синусите претставуваат серија на меѓусебно поврзани шуплини во нашиот череп. Тие произведуваат слуз што ја влажни внатрешноста на носот. Инфекциите, настинките и алергиите можат да предизвикаат појава на хроничен синузитис. Тоа е состојба кога во синусите се акумулира слузта, но и доста бактерии. Тоа доведува до главоболки, притисок во главата и лицето и тешки болки во лицето. Процедурата наречена балонска синупластија е хируршка процедура којашто го решава овој проблем.Им овозможува на хирурзите да ги одблокираат синусните отвори за да го ослободат пациентот од болките и притисокот.
Повеќе од 250 илјади пациенти се третирани со балонска синупластија.
Прв чекор од постапката е внесување на балон низ носот во преминот на синусите. Потоа балонот се дуе за да се прошири отворот на синусот, што овозможува истекување на слузта. Тоа го ослободува пациентот од непријатните симптоми на синузитисот. Уредот поседува систем за одводнување за да се отстрани содржината на синусите под очите (Maxillary sinus).
Револуционерноста на оваа постапка се состои во тоа што не е потребно отстранување на коски и ткиво од носот, како поранешните процедури на чистење на черепните шуплини во лицето.
Сега процедурата е многу побезбедна и помалку инвазивна и секако помалку страшна за пациентите. Оваа балонска техника се смета за алтернативна техника на класичниот функционален ендоскопски оперативен зафат. Поради помалиот ризик и малкуте компликации, балонската синупластија може да биде спроведена и во мала ординација под локална анестезија. Друга позитивна страна на овој неинвазивен третман е тоа што многу пациенти не се соодветни кандидати за класичната операција на отворање синуси, дали поради возраста, дали поради здравствената состојба, претходните реакции кон целосната анестезија или едноставно поради преголем страв.
Студиите покажуваат дека пациентите кои имале балонска дилатација на синуси многу побрзо закрепнувале, помалку крвавеле, а исто така имале помала потреба од лекови против болки. Сепак, оваа постапка има и свои негативни страни. Недостатокот на оваа хируршка процедура е тоа што таа може да не е соодветна за сите пациенти со хроничен синузитис и рекурентен синузитис. Клиничките истражувања ги исклучуваат следниве категории на пациенти со: Еозинофилна болест, тешка полипоза или габичен синузитис, тешко септално отстапување, цистична фиброза, фацијална траума или астма чувствителна на аспирин.
