Сте се запрашале ли што е тоа што не тера да јадеме прекумерно?
Се повеќе луѓе имаат проблеми со прекумерно јадење на храна. Со текот на времето тоа може да доведе до згоеност или прекумерна телесна тежина, состојба која се опишува како нарушување во исхраната. Како резултат на едно истражување се дошло до заклучок дека причината поради која некои луѓе се прејадуваат можеби е недостатокот на одреден хормон во мозокот. Според истражувачите, овие резултати можат да ги сменат мислењата околу тоа кои се причините за прекумерна телесна тежина кај луѓето, како и за начините на кои оваа состојба може да се третира.
Истражувачите дошле до заклучок дека токму недостатокот на хормонот наречен пептид-1 сличен на глукагон – glucagon-like peptide-1 (GLP-1) во мозокот е тоа што предизвикува прејадување. Тие го намалиле нивото на овој хормон во централниот нервен систем на некои од лабораториските глувци и увиделе дека токму тие глувци со намалено ниво на овој хормон имале прилично зголемена потреба од внесување на храна, особено калорична и мрсна храна. Додека пак, кога нивото на овој хормон било зголемено, нивната зголемена потреба за внесување на калории исчезнала и тие јаделе помалку.
Тие објаснуваат дека благодарение на хормонот GLP-1, мозокот добива инфомација кога сме изеле доволно храна и се спречува прејадувањето. На овој начин мозокот контролира колку јадеме за да не се соочуваме со прејаденост. Според ова истражување, доколку се фокусираме на горенаведените причини за прејадување тогаш можеби ќе дојдеме до некакво поефикасно решение кога станува збор за справување со прекумерната телесна тежина. Истражувачите тврдат дека доколку се открие како централниот нервен систем го регулира внесувањето на храна со помош на хормонот GLP-1, тогаш можеби ќе се најде соодветна терапија за третирање на прекумерната телесна тежина – нарушување во исхраната.
Од друга страна пак, експертите од Центарот за превенција на прекумерна телесна тежина Global Obesity Prevention Center велат дека постојат и многу други причини кои водат до прејадување. Според нив, иако прејадувањето е можеби поврзано со различното ниво на хормон во мозокот, тоа не значи дека хормоните се главна причина за прејадување. Секојдневниот стрес, различните културни навики кога станува збор за храната како и многу други фактори исто така влијаат врз количината на храна која ја јадеме и треба да се земат во предвид.
Прекумерната телесна тежина може да се нарече болест на модерното време. Постојат одредени причини кои може да доведат до оваа состојба и секој медицински напредок кога станува збор за справување со ова нарушување во исхраната би бил добредојден.
