muzikata-go-podobruva-zdravjeto_image
Споделете со пријателите!

Пеењето придонесува за намалувањето на хормонот на стресот
Познатиот Џими Хендрикс рекол дека „Доколку нешто треба да се промени во светот, тоа би можело да се направи само преку музиката“. Постојат многубројни мисли за музиката и за нејзиното силно позитивно влијание на многу полиња. Музиката претставува уметност, забава, задоволство и лек за умот и телото. Многубројни истражувања докажуваат дека музиката, нè развеселува и го подобрува нашето расположение, но и на многу начини може да придонесе за подобрување на физичкото и психичкото здравје.

„Музиката е една од малкуте активности што го активира, стимулира и го користи секој дел од нашиот мозок“

Музиката е една од малкуте активности што го активира, стимулира и го користи секој дел од нашиот мозок. Музиката е разновидна, таа е дел од сите култури во светот и има изненадувачки позитивни влијанија на многу полиња, на пример, поттикнува полесно учење на јазикот, ги подобрува меморијата и фокусот и помага во физичкиот развој и координација. Прочитајте кои се останатите здравствени придобивки од музиката.

Музиката ја намалува болката

Докажано е дека музиката има позитивно ефекти во ублажувањето на болката. Таа може да помогне во намалувањето на интензитетот на хроничната и постоперативната болка. Терапијата со музика сè почесто се практикува како замена за медикаменти при и после пораѓање. Според едно истражување, спроведено во 2006 година, објавено во Британскиот дневник „Journal of Advanced Nursing“, докажано е дека терапијата со музика ја намалува болката којашто се појавува од многубројни заболувања и состојби, меѓу кои кај остеоартритисот, ревматоидниот артритис и до 21%, 25% помага во лекувањето на депресијата.

„Сите овие научни студии докажуваат дека музиката го стимулира излачувањето на ендорфинот“

Друго истражување од 2009 година, покажува кои одредени типови на музика можат значително да ја намалат болката кај пациентите на интензивна, палијативна или геријатриска нега. Сите овие научни студии докажуваат дека музиката го стимулира излачувањето на ендорфинот, хормон којшто ја намалува болката, а особено бавната музика опушта и го релаксира телото притоа забавувајќи го дишењето и срцебиењето.
muzikata-go-podobruva-zdravjeto_image1

Музиката го намалува крвниот притисок

Слушањето релаксирачка музика секое утро и секоја вечер делува позитивно кај луѓето со висок крвен притисок. Всушност, релаксирачките звуци помагаат во намалување на високиот притисок и притоа негово одржување во границите на нормалата. Ова го докажува едно научно истражување спроведено во 2007 година. На ова истражување се надоврзува и друго истражување спроведено од организацијата „American Society of Hypertension“ коешто потенцира дека 30 минути слушање класична (или келтска) музика секој ден може значително да го намали крвниот притисок.

Музиката го одржува здравјето на срцето

Докажано е дека музиката е добра за срцето. Имено, студија во која италијански и британски научници спровеле истражување на млади мажи и жени, од кои половина биле образувани музичари, покажува дека различното темпо на музиката различно влијае на работата на срцето. На испитаниците коишто биле дел од ова истражување им била дадена задачата да слушаат шест различни стилови на музика, вклучувајќи примери од класичната и рап-музиката. Додека испитаниците ја слушале музиката, правејќи две-минутни паузи помеѓу секој од стиловите, истражувачите го следеле нивното дишење, отчукувањето на срцето и крвниот притисок. Резултатите прикажале дека кога испитаниците слушале пожива музика, нивното срце и дишењето биле побрзи, додека кога слушале бавна музика истите се забавувале.

Без разлика на тоа дали на испитаниците им се допаѓал стилот на музика или не, неговото темпо имало значителен релаксирачки ефект.

Музиката го зајакнува имунитетот

Научниците објаснуваат дека активното свирење на било кој музички инструмент и пеењето може да создадат позитивно и длабоко емоционално искуство, што поттикнува излачување на хормоните што го зајакнуваат имунитетот на организмот. Свирењето на инструмент и пеењето, исто така придонесуваат и во намалувањето на „хормонот на стресот“ – кортизол.

Прочитајте:  ИНТЕРВЈУ со д-р Мешковска Бонгард: Се зголемува свеста за кардиоваскуларното здравје

Музиката го подобрува спиењето и помага во лекувањето на несоницата

Едно истражување, спроведено во 2008 на група студенти, покажа дека музиката помага во третирањето на несоницата кај студентите. Друго истражување спроведено на возрасни луѓе коишто страдаат од несоница, покажало дека музиката на Јохан Себастијан Бах ги смирува и им помага полесно и побрзо да заспијат. Музика ги релаксира мускулите и го отргнува вниманието од мислите пред заспивање, како и ја намалува анксиозноста и крвниот притисок што помага за полесно заспивање.

Музиката влијае позитивно на мозокот и неговите активности

muzikata-go-podobruva-zdravjeto_image2Музиката ја активира функцијата на сите делови на мозокот, вклучувајќи ги и моторниот, аудиторниот и лимбичкиот систем. Со ова се потврдува и нејзиното позитивно влијание на усовршување на когнитивните вештини, а меѓудругото и на просторните и математичките вештини. Феноменот наречен „Моцартов ефект“ е еден веродостоен доказ дека слушањето класична музика, исклучиво Моцарт, може да ги зголеми добрите резултати на когнитивни тестови. Всушност, едно истражување докажува дека слушањето на било која музика во којашто уживаме има позитивни ефекти на когнитивните вештини.

Музиката мотивира и ја подобрува физичката активност

Изборот на музика којашто нè мотивира и ни дава енергија го олеснува процесот на движење, пешачење, танцување, и воопшто, вежбање. Практикувањето на било која физичка активност слушајќи музика прави да го перцепираме вежбањето повеќе како лесна рекреативна активност, а помалку како тешка и исцрпувачка. Слушањето на омилената енергична музика додека трчаме или спортуваме, со сигурно мотивира да се вежба активно што придонесува во постигнувањето подобри резултати.


Споделете со пријателите!