Многу вкусно колаче со коњак
Ликер, рум, пиво… во колачи може да се додаде сè, а овојпат колачето е со коњак. Тоа е неверојатно сочно, а уште поубаво е вториот и третиот ден. Може да го направите и со сливи и не штедете коњак, бидејќи му дава сочност. Ако имате при рака рузмарин, секако ставете, колачето е поинтересно со него.
- 3 круши, исечени на осминки (или 7 – 8 модри сливи);
- ¼ – ½ шолја коњак;
- 2 лажици темно кафеав шеќер;
- 200 г брашно (јас ставив 100 г интегрално и 100 г сенаменско);
- 1 кесичка прашок за пециво;
- 1 ½ лажица свеж рузмарин, ситно исецкан;
- 125 г путер, на собна температура (или 9 лажици сончогледово масло);
- 125 г шеќер;
- 2 јајца;
- 2 лажици јогурт
Ставете ги крушите во здела, посипете ги со 2 лажици кафеав шеќер, прелијте ги со коњакот и оставете ги да стојат 1 час.
За печење може да употребите 3 мали тавчиња со дијаметар од 10 – 12 см или едно големо со дијаметар од 18 – 20 см, кои ќе ги намачкате со путер. Изматете ги путерот и шеќерот околу 2 – 3 минути. Додајте ги јајцата, еднo по едно, и убаво изматете ги со путерот. додајте ги брашното, прашокот за пециво, рузмаринот и јогуртот и помешајте ги со путерот на најниската брзина, само додека не се соединат. Истурете го тестото во тавчето (или тавчињата), израмнете ја површината и наредете ги крушите без течноста. Печете го колачето во загреана рерна на 180°C, околу 30 – 40 минути. проверете со боцкање со чепкалка во средината. Ако краевите на колачето почнат да се заруменуваат, а средината сé уште не е испечена, покријте го со хартија за печење или алуминиумска фолија.
Откако ќе го извадите колачето од рерна, веднаш со лажица прелијте го со коњакот во кој се наоѓаа крушите, оставајќи секоја лажица да се впие. Оставете го колачето да се олади петнаесетина минути, па исечето го и послужете го. Чувајте го во фрижидер.
* рецептите со во целост преземени од ситно сецкано
