Исхраната и однесувањето на жената во текот на бременоста значајно влијае на развојот на фетусот
Периодот на бременост претставува значајна промена во животот на жената но и на целото семејство. Имајќи во предвид дека исхраната и однесувањето на жената во текот на бременоста значајно влијае на развојот на фетусот многу е важно идните мајки да бидат добро информирани и да се придржуваат кон лекарските совети. Бројни студии потврдуваат дека недоволна и/или лоша исхрана на мајката во тек на бременоста може да резултира со плод со мала телесна тежина. Згора на тоа недостаток на некои витамини и минерали, особено во првиот триместар од бременоста може да доведе и до појава на конгенитални малформации на поедини органи и системи. Општоприфатена е тезата меѓу медицинските работници дека само со исхрана во тек на бременоста не можеме да гарантираме доволен внес на потребните нутриенти поради што се препорачва дополнителен внес на: фолна киселина, железо, витамин Ц, омега3, магнезиум, цинк, калциум , витамин Д и други.
При тоа клучни се сепак фолната киселина и железото. Недостаток на фолна киселина (витамин Б9) во периодот на органогенезата може да предизвика дефекти на неуралната туба. Притоа многу е важно да внесеме фолна киселина во т.н. активен облик (5 тетрахидрометилфолат) и тоа во препорачаната дневна доза од 400 ug,
Железото овозможува нормално создавање и функционирање на еритроцитите како и пренесување на доволна количина на кислород во ткивата на фетусот. Последиците од недоволен внес на железо вклучуваат: анемија, предвремено породување и раѓање на новороденче со мала телесна тежина. Со оглед на неговиот непријатен метален вкус, појавата на црна столица и нагоните за гадење и повраќање железото треба да се внесува во обложена (микроенкапсулирана) форма. За соодветна апсорпција на железо неопходно е да се консумира заедно со Витамин Ц кој создава потребна кисела средина. Не треба да се занемарат и калциумот и витамин Д кои се клучни за развој на коскеното ткиво на плодот, мора дополнително да се внесуваат бидејќи во спротивен случај организмот ќе го мобилизира на калциумот од мајчините коски.
И на крајот, но не и помалку важно, бремените жени треба редовно да го посетуваат матичниот гинеколог и да ги вршат предвидените тестови. Тоа е најсигурниот пат до безбедна бременост и здраво потомство.
Д-р Сотир Николовски – специјалист гинеколог
