Повеќето деца се одвикнуваат од пелените на возраст од 2 до 4 години, но сепак, секое дете се развива со сопствено темпо и периодот на одвикнување може да биде различен.
Одвикнувањето од пелени е процес на тренирање на детето да го контролира мочниот меур и дебелото црево и да ги користи нокширот или тоалетната школка.
Додека повеќето деца се одвикнуваат од пелените на возраст од 2 до 4 години, секое дете се развива со сопствено темпо и периодот на одвикнување може да биде различен. Но дури и откако детето ќе се научи да го контролира мочниот меур и да ја користи тоалетната школка може да се случи да има повремена „несреќа“ што е сосема нормално и вообичено на почетокот.
Родителите и другите членови на семејството треба да му помогнат на детето полесно да се прилагоди на користењето на нокширот или тоалетот и во текот на периодот на учење треба да бидат трпеливи и постојано да го охрабруваат.
Кога да започнете со одвикнување од пелени?
Возраста сама по себе не определува дали детето е подготвено за учење како да ја користи тоалетната школка. Најдобро време е она кога детето ќе биде емоционално и физички подготвено за овој непознат чекор. Вообичаено се потребни неколку месеци за детето да научи да ги контролира мочниот меур и дебелото црево во текот на денот. Колку долго ќе биде потребно вообичаено зависи од детето.
Имено, обично постои разлика помеѓу контролата на потребата за одење во тоалет во текот на денот и во текот на ноќта. Ноќната контрола често трае подолго и понекогаш може да бидат потребни месеци или години додека детето да се научи да станува од спиење за да го користи тоалетот. Оттука, имајте на ум дека, иако детето можеби лесно ќе се одвикне од пелените во текот на денот, во текот на ноќта може повторно да му бидат потребни и ова е сосема нормален процес.
Знаци дека вашето дете е подготвено да го користи нокширот или да оди во тоалет
Детето може да биде подготвено да го користи нокширот или да оди во тоалет кога:
- Ќе може да остане суво неколку часа во текот на денот;
- Ќе започне да препознава дека сака да го користи тоалетот;
- Ќе започне да користи зборови, гримаси или гестови за да ви каже или да ви покаже дека сака да го користи тоалетот;
- Само ќе оди кај нокширот или тоалетната школка и ќе седи на нив;
- Ќе почне да ја извлекува облеката нагоре и надолу.
Совети како да започнете со одвикнување од пелени
Ако забележите некои од горенаведените знаци, спремете се да започнете да го обучувате вашето дете да користи нокшир или тоалетна школка. Следете ги следниве совети:
- Научете го детето за намената на нокширот и тоалетната школка;
- Практикувајте седење на нокширот и тоалетната школка неколку пати во денот;
- Облекувајте го детето во полесна облека којашто ќе се учи самото да ја соблекува;
- Прашувајте го почесто дали сака да оди во тоалет и научете го да ви кажува кога му се оди во тоалет;
- Охрабрувајте го само да се соблекува и да седи на нокширот.
