Промените кои настануваат во структурата на мозокот кога учиме нов јазик се навистина значајни
Учењето на нов јазик носи многу придобивки и тоа на сите можни гледишта. Доколку се посветиме на учење на нов јазик тоа може значајно да го смени нашето гледиште на светот, ни ги отвара вратите за нови искуства, запознавање на нови луѓе, но исто така ја менува и структурата на нашиот мозок. Но, што е тоа што всушност се случува во мозокот кога учиме нов јазик?
Кога учиме нов јазик, во мозокот се случуваат некои промени. Ние создаваме нови нервни патишта. Левата хемисфера е местото каде се развиваат нашите јазични вештини. Според едно истражување, доколку се посветиме на учење на нов јазик, церебралниот кортекс (слој на неврони кои се одговорни за мислата, свеста, меморијата и јазикот) се задебелува. Токму ваквото задебелување може да ги отвори вратите за подобрена меморија и поостро размислување во подоцнежните години од нашиот живот. Учењето на нов јазик во поодминатите години од животот, го менува мозокот на ист начин како и учењето на комплицирани моторни вештини (танцување или жонглирање на пример).
Сепак, учењето на јазици има и други придобивки покрај ваквото влијаење врз структурата на мозокот. Јазиците го менуваат нашето гледиште на светот. Ова може да се потврди ако ја земеме во предвид перцепцијата на боите.
На пример, луѓето кои зборуваат јапонски јазик можат да видат повеќе нијанси на сината боја отколку луѓето што зборуваат англиски јазик. Во јапонскиот јазик има многу повеќе зборови за да се опишат светлите и темните нијансите на сината боја. Некои од тие зборови за нијансите на сина боја не можат да се најдат во англискиот јазик.
Од друга страна пак, племето Химба во Јужна Африка има само пет збора за да ги опише сите бои кои постојат. Тие ги групираат сличните бои и ги нарекуваат со едно име. На пример, сините и зелените нијанси ги нарекуваат со едно име. Научниците заклучиле дека непостоењето на одделен збор за сина и зелена боја го спречува племето Химба да ја разликува сината боја од зелената.
Кога учиме нов јазик, ние, покрај граматиката и вокабуларот, несвесно присвојуваме и ново гледиште на светот. Нашата перцепција на работите се менува затоа што јазикот и културата која тој ја претставува, како и нашите когнитивните процеси, се силно поврзани.
Токму поради сите овие причини, учете нови јазици. Никогаш не е доцна да научиме нов јазик и да се збогатиме. Искористете ги когнитивните придобивки од учењето на нови јазици и проширете ги гледиштата на светот околу вас.
