Просторите коишто се пренатрупани со предмети ги исполнуваат нашите визуелни полиња и може да го блокираат нашиот мозок.
Сигурно сте забележале дека понекогаш нередот во вашиот дом ви предизвикува чувство на вознемиреност, а чистите површини чувство на пријатност и ослободување. Се чини дека, всушност, просторот во којшто живееме може значително да влијае врз нашето ментално здравје.
Имено чистењето на домот, средувањето на предметите, облеката и организирање на просторот може да ги има следните придобивки за менталното здравје на човекот.
Чувство на задоволство
Дури и ако вашиот неред е скриен во плакарот и фиоките, вие знаете дека е таму и може постојано да се чувствувате виновни за вашата неуредност. Кога се грижиме за нашиот простор, тоа ни дава чувство на исполнување, кое нашиот мозок го смета за неверојатно пријатно чувство.
Полесно и побрзо чистење
Кога книгите, списанијата и сите останати предмети во домот ви се неуредно натрупани на отворените полици, многу е тешко да го исчистите просторот под и зад нив и, оттука, честопати во брзање ја оставате скриена прашина. Доколку уредно ги сместите предметите ќе можете брзо да ги тргнете и полесно и побрзо да ја избришете прашината којашто се собира околу нив.
Јасно размислување
Просторите коишто се пренатрупани со предмети ги исполнуваат нашите визуелни полиња и може да го блокираат нашиот мозок. Како резултат на тоа, потешко се фокусираме на задачите, бидејќи многу работи ни го привлекуваат вниманието. Спротивно на тоа, уредни и слободни простори со минимални предмети имаат моќ да го релаксираат нашиот мозок, притоа зголемувајќи го нашиот ментален простор и концентрацијата.
Подобра ефикасност
Колку повеќе предмети имаме во домот и колку помалку сме организирани, толку е потешко да го најдеме она што ни треба. Времето што можеме повремено да го вложуваме во организацијата се исплаќа и во иднина може да ни заштеди многу време и енергија.
Намалена фрустрација
Голем дел од стресот што го доживуваме доаѓа од секојдневните проблеми што нè снаоѓаат на работното место и дома. Ние често го потценуваме ефектот што овие навидум мали и незначајни работи го имаат врз нашата благосостојба, но доброорганизиран дом и работно место може да имаат огромен позитивен ефект врз нашето расположение, среќа, па дури и врски.
Катализатор за понатамошни промени
Промените на просторот во којшто живееме ни даваат сила што можеме да ја насочиме кон многу области на нашиот живот. Средено и исчистено работно биро може да ни помогне да се фокусираме на нови работни проекти, додека доброорганизирана кујна да нè поттикне да започнеме да подготвуваме повеќе здрави оброци.
