Статистиката вели дека грчевите или колики се јавуваат кај 40% од бебињата
Грчевите се ноќна мора на секој родител. Наместо да го гледате Вашето слатко бебе како среќно спие во креветчето (како што замислувате), во домот често владее плач и хистерија кај родителите (непотребни кавги, нервоза, несоница). Се проценува дека дури 40% од бебињата имаат грчеви, кои обично започнуваат на 3-та недела и завршуваат во 4-тиот месец од животот.
Но, не постојат правила – некои бебиња имаат грчеви веќе во родилиштето, а кај други траат се додека детето не достигне шест месеци. Грчевите не се болест, туку симптом кој настанува пред се поради неразвиениот ензимски систем за варење кај бебињата и поради недостатокот на пробиотски бактерии во гастроинтестиналниот тракт. Други причини се неправилно доење при кое бебето голта воздух, прејадување, нездрава исхрана на мајката или интолеранција на лактоза. Бебешките колики ги препознаваме по неутешниот плач кај доенчето кој трае повеќе часови, неколку дена во неделата а се засилува во вечерните часови. Плачот е интензивен и проследен со грчеви на лицето, грчење на нозете и испуштањена гасови.
За ублажување на состојбата се препорачува отстранување на воздухот од стомакот кај бебето после секое доење со нежно тапкање по грбот и масажа на стомачето (со подригнување). Особено е важно мајката која дои правилно да се храни со големи количества на овошје и зеленчук, месо и доволна количина вода. Доилките треба да избегнуваат тешка храна, сувомеснати производи и конзервирани производи.
Со оглед на потврдената важност од постоење на здрава микрофлора за правилно варење на храната и добар метаболизам употребата на пробиотици кај грчеви има смисла. Пробиотските капки со Lactobacillus reuteri помагаат да се создаде микрофлора кај доенчињата, и значително го намалува плачењето на бебињата со грчеви со што битно го подобруваат на квалитетот на животот на целото семејство!
Д-р Виктор Мурџев, специјалист педијатар
