Речиси 80% од сексуално активните мажи и жени, добиваат ХПВ инфекција во некој период од нивните животи!
Човечкиот папиломен вирус (HPV — Human Papillomavirus) е најчестата сексуално пренослива инфекција која се манифестира на кожата и мукозните мембрани кај луѓето. ХПВ е толку чест што речиси 80% од сексуално активните мажи и жени, го добиваат во некој период од нивните животи. Многу е поопасен за жени отколку за мажи. Многу често инфицираните немаат никакви симптоми на вирусот.
Има околу 130 различни типови на ХПВ и иако повекето ХПВ инфекции се бенигни, предизвикувајќи брадавици на рацете, нозете, лицето и гениталиите, постојат и типови на ХПВ кои можат да предизвикаат сериозни здравствени проблеми како цервикален канцер, канцер на вагината, анален канцер па дури и канцер на грлото.
Како да се превенира ХПВ инфекцијата?
- Со вакцинирање против ризичните типови на ХПВ (6, 11, 16 и 18), кое е ставено во календарот за вакцинација кај девојчиња на 12 годишна возраст, со што значајно се намалува опасноста од рак на грлото на матката;
- Зголемување на имунитетот преку соодветна здрава исхрана базирана на намирници богати со Витамин Ц (цитрусни овошја и јагоди), Витамин Д (риба), храна богата со пробиотици (кефир, јогурт), храна богата со селен (бразилски ореви, печурки), мед, прополис, ехинацеа итн.
- Употреба на презервативи при сексуален однос со што значајно се намалуваат шансите да се добие ХПВ вирусот;
- Избегнување на сексуални односи со личност која има видливи симптоми на ХПВ – орални и генитални брадавици;
- Редовна контрола на гинеколог, односно папаниколау тест (ПАП) се препорачува да се прави еднаш годишно.
Што доколку веќе имаме потврдена генитална ХПВ инфекција?
Нема конкретен лек за ХПВ инфекциите, но многу е важно да се контролира и спречи нејзината прогресија со цел да не предизвикува дополнителни проблеми. Клучот во борбата со ХПВ инфекцијата е одржување на добар имунитет што подразбира:
- Соодветен хигиенодиететски режим кој вклучува: здрава исхрана богата со риба, овошје и зеленчук, внес на сиров морков (200г/ден), престанок со пушење и конзумација на алкохол. Исклучување на брза храна, шеќер и газирани пијалоци;
- Примена на соодветни додатоци во исхраната за засилување на имунитетот кои во себе вклучуваат: пробиотици од типот Bacillus subtilis, витамин Ц (до 2г/ден), Цинк (10мг/ден), Витамин Е (до 800IU/ден), Витамин Д (до 800IU/ден), Коензим Q10, Селен, фолна киселина итн;
- Контрола на стресот бидејќи ги намалува во телото т.н. natural killers клетки кои се критични за одбрана од болести;
- Сексуални односи со презерватив се до добивање на негативен ПАП тест.
Истотака не заборавајте во редовната рутина да вклучите 2-3 посети на гинеколог годишно, при кои со направен ПАП тест ќе ја контролирате прогресијата на ХПВ инфекцијата и вашиот лекар ќе може навремено да ви препорача соодветна терапија и дополнителни совети.
