Прочитајте како може да го подобрите квалитетот на живот доколку патите од уринарна инконтиненција
Уринарна инконтиненција преставува појава на неможност за контролирање на актот на мокрење т.е. неволно испуштање на урина. Постојат повеќе видови на инконтиненција, а таа е позачестена кај женската популација. Исто така, пациентите со овој проблем имаат нарушен квалитет на живот. Има повеќе видови на инконтиненција. Тие се:
Ургентна инконтиненција: нагон за неодолива потреба за мокрење која е тешко да се одложи;
Стрес инконтиненција: неможност да се задржи урината при зголемен интраабдоминален притисок;
Мешана инконтиненција: комбинација од претходните две;
Owerflow (преливна): се јавува при преполнет мочен меур.
Постојат и конгенитална, фистулозна и неурогена инконтиненција. Инконтиненцијата е повеќе застапена кај постарата популација што значи дека може да се сретне до 60% кај лица над 65 години. Што се однесува на застапеност според полот, повеќе се јавува кај женската популација. Пациентите со уринарна инконтиненција имаат пореметување на квалитетот на живот. Постојат:
- Физички ограничувања – како што се лимитирање на извршувањето на работните обврски и движење,пореметување на сонот а со тоа и замор отежната концентрација, пореметена исхрана;
- Психолошки ограничувања – депресија чувство на вина, страв од мислењето на околината и недостаток на самодоверба;
- Социјални ограничувања – избегнување на друштво, избегнување на патувања, потреба од достапност на тоалети.
Сето тоа влијае на хигиената бидеќи потребен е специјален долен веш заради ширење на непријатна миризба. Има влијание на работоспособноста што доведува до отсуства од работа намалена продуктивност и др. Многу е важно што влијае на интимноста во смисла на избегнување блискост и избегнување секс.
Поврзаноста на уринарната инконтиненција со женската популација најчесто е поврзана со менопауза. Тоа доведува до намалено ниво на естрогени кое доведува до оштетување на мукозата на уретрата која има улога во сфинктерниот механизам и со пореметување на васкуларизацијата и создавање на фиброзни промени урината несакано истекува од мочниот меур.
Заради сите овие несакани појави потребно е да се најде соодветен третман како би се подобрил нивниот квалитет на живот. Има повеќе начини на третман и главна цел е да се намали иритабилноста на мочниот меур со релаксација на детрусорот и со зајакнување на сфинктерите и мускулите на урогениталната дијафрагма. Прво потребно е да се промени начинот на живот – како намалување на употреба на алкохол,цигари и кофеин. Намалување на телесната тежина, бидеќи жените со прекумерна телесна тежина се склони кон уринарна инконтиненција. Намалување на интензивни физички активности и др. Употреба на физикална терапија со кегелови вежби и електростимулација на сфинктерниот механизам. Следува хируршки третман – постојат повеќе начини, но тоа е крајна опција.
Најчесто применуван третман е медикаментозната терапија.
Се употребуваат антимускарински соединенија кои селективно ги блокираат мускаринските рецептори спречувајќи контракција на мазните мускулини влакна на детрузорот кои се со најголема густина во уроепителот. Со тоа се зголемува капацитетот на мочниот меур и се намалува чувството на ургентност. Најчесто употребуван лек е солифенацин. Во секојдневната пракса најчесто го даваме во доза од 5 мг 1 на ден до 3 месеци. Резултатите покажале голема ефикасност со што квалитетот на живот кај овие пациенти, особено кај женската популација е многу подобар.
Д-р Влатко Кузманоски, специјалист уролог
