Многу мајки го намалуваат доењето или прекратуваат со доење порано отколку што би требало, понекогаш тоа го прават по свој избор, но понекогаш не
Прво осигурете се дека навистина немате доволно млеко. Понекогаш бебето може да не сака да цица заради неправилно поставување на градата или неправилна положба. Ако навистина немате доволно млеко постојат некои едноставни работи преку кои со малку упорност и трпение ќе си помогнете да си го решите проблемот.
Најефикасен метод за создавање на млеко е доењето
Многу мајки кога ќе се соочат со мало количество на млеко подлегнуваат на искушението да преминат на вештачко млеко. Обидете се да истраете со доењето, ползата која ја има бебето од доењето е непроценлива. Најефикасниот начин за зголемување на количеството на млеко е честото доење, без ограничување, секогаш кога бебето ќе побара. Ако сте загрижени дека немате доволно млеко, најважното што можете да го направите е да го доите бебето што повеќе. Кога ќе се роди бебето треба да се стави на градата на мајката колку може побрзо и потоа да се продолжи со често доење. Доењето се одвива на принцип на стимулација и реакција.
Она што е најважно е редовното доење на бебето. Дури и кога градите не изгледаат полни и тешки дајте му на бебето да цица, во нив сеуште има млеко кое ќе може да се исцеди. Почестото и подолгото доење го зголемува производството на млеко во градите. Доењето функционира на принцип на стимулација и реакција. Се работи за рефлекс, градите природно произведуваат толку млеко за колку што има барање, односно потреба. Колку бебето повеќе цица, толку вашето тело се стимулира за да создава повеќе млеко. За да имате богато количество на млеко многу важно е да го доите бебето или да се одмолзувате барем 8-12 пати во текот на денот. Дојте го бебето секогаш кога ќе посака. Дојте го и во текот на ноќта, ако не сака да цица, одмолзете се сами со рака или пумпа.
На секое доење дајте му на бебето да се храни од двете гради. Не гледајте на часовникот за да го ставите бебето на другата града, туку почекајте само да се тргне од градата, па префрлете го на другата страна. Значи секогаш кога го доите прво нека ја испразни едната града, па префрлете го на другата.
Секогаш кога на бебето му треба храна или утеха, доењето нека биде вашиот прв избор. Избегнувајте да го залажувате со цуцла, се додека не се воспостави нормално доење.
Избегнувајте да го храните бебето од шише со цуцла
Чувството што го има бебето и силата што ја употребува кога пие од шише и се дои од мајката се различни, па тоа може да го збунува и фрустрира. Млекото полесно тече од шишето отколку од градата, тоа може да предизвика по искуството со шишето бебето да не сака да употреби повеќе сила за да се дои од мајката. Пред доењето или одмолзувањето обидете се да се опуштите неколку минути, тоа ќе го олесни дотокот на млеко. Ако бебето некогаш не е со вас или не е заинтересирано за доење, редовно издојувајте се. Колку повеќе се одмолзувате, толку ќе произведете повеќе млеко. Ако одите на работа користете пумпа на секои неколку часа, така вашето тело ќе продолжи да се стимулира да произведува млеко.
Други совети за повеќе млеко
Друга многу важна работа е да пиете доста течности. Доилките преку доењето губат течности, па затоа имаат поголема потреба за нивно надоместување. Пијте многу вода или сокови. Уште една многу важна работа е одморот. Стресот може да го намали количеството на млеко. Иако е тешко да бидете одморени кога имате бебе, сепак обидете се да се организирате така да имате време и за сон, можеби така што ќе побарате помош од некого. Избегнувајте да му давате на бебето вештачко млеко и сокови. Така тоа ќе има помал апетит за доење, а вие автоматски ќе имате уште помалку млеко.
Она што треба вие да избегнувате е:
- Пушење – никотинот покрај тоа што е многу штетен за бебето, го редуцира и производството на млеко
- Антибеби пилули – пилулите содржат хормони, а естрогените може да го редуцираат млекото кај мајката.
- Ригорозни диети – доењето троши калории, немојте да држите ригорозни диети. Ако не примате доволно храна, нормално е производството на млеко да се намали. Според некои лекари за доењето да се одвива нормално потребно е мајката да прима од 1800-2200 калории.
