Десет начини како да го натерате вашето дете да ве послуша и да следи инструкции
1. Обидете се да го привлечете вниманието на вашето дете
Давање задача кога вашето дете не е фокусирано на вас може да ви донесе неуспех. Привлечете го вниманието на вашето дете, велејќи: „Погледни кон мене те молам. Сега треба да ме слушнеш“. Некои деца имаат потешкотија со невербалните аспекти на јазикот. Барајќи од вашето дете да погледне кон вас го насочува неговото внимание. За да комуникацијата биде успешна најдобро е да се потрудите да сте во права линија на неговиот поглед.
2. Минимизирајте ги сите надворешни дразби кои го одвлекуваат вниманието
Откако ќе го привлечете вниманието на вашето дете, треба да го задржите. За него е тешка задача следење на упатства додека тоа игра видео игри или кога е уклучен ТВ приемникот. Ваша задача е да ги минимизирате сите одвлекувања пред да дадете насоки за да направи нешто. Исклучете го телевизорот. Побарајте од вашето дете да ја прекине играта или да ја спушти книгата. Бидете сигурни дека тоа гледа кон вас.
Ова однесување може да го надополните и со вашето комплетно внимане кон детето додека ја давате инструкцијата. Тоа, исто така, му покажува на вашето дете дека она што го кажувате е важно.
3. Зборувајте тивко
Можеби ќе ви изгледа логично да зборувате погласно кога имате нешто важно што треба да го кажете или да направите. Но, подобро ќе привлечете внимание со тоа што ќе зборувате со помек тон. Дајте насоки со мирен, дури и понизок тон. Вашето дете полесно ќе се фокусира на суштината на она што треба да го кажете кога нема да мора да го обработува тонот и обемот на тоа што ќе биде кажано.
4. Користете метод „време на чекање“
Наставниците честопати го користат „времето за чекање“. Истото важи и за образовни ТВ-емисии за деца. „Време на чекање“ е пауза од три до седум секунди откако ќе кажете нешто или прашате некое прашање. Истражувањата покажуваат дека децата подобро го обработуваат она што треба да го кажат – и соодветно да одговорат на тоа што се прашани – кога ќе помине ова време.
Доколку сè уште не може да ги следи упатствата или да одговори на вашето прашање после таа пауза, во ред е да го повторите она што сте го кажале.
5. Проверете дали тоа разбира што се бара од него
Проверката дали детето ве разбрало оди рака под рака со „времето за чекање“. Побарајте од вашето дете да ви ги повтори упатствата. Или побарајте од него да ги објасни вашите барања со свои зборови. Со тоа му давате шанса на детето да постави прашања ако има. Исто така, ви дава шанса да го разјасните она што сте го кажале во случај тоа да разбрало нешто погрешно.
6. Кажи, не прашувај
Многу родители ги опишуваат упатствата како прашања, како на пример: „Дали би го средил бирото?“ Вашето дете може да мисли дека има избор. Она што сакате да го постигнете кажете го едноставно велејќи: „Ајде среди го своето биро те молам“, може да направи голема разлика.
7. Инструкциите давајте ги една по една
Помалите деца, особено оние кои имаат проблеми со учењето и вниманието може да имаат проблем да следат низа чекори. Кога би кажале: „Те молам, постави ја масата, миј ги рацете и кажи ѝ на сестра ти дека е време да јадете“. Вашето дете може да заглави по поставувањето на масат. Секогаш кога е можно давајте ги насоките една по една.
Ако не можете да ги поделите упатствата во чекори, обидете се да ги групирате заедно на начин кој има смисла. На пример, „Додека горе ги миеш рацете, кажи и на сестра ти дека е време да јадете“.
8. Набројување на насоките
Со ставање на број на задачите кои ги задавате ќе му помогнете на детето полесно да ги запамти. Типично, луѓето можат да запамтат до четири работи во исто време во работна (краткотрајна) меморија. Ова е полесно да се направи кога тие се поврзани логички или пак доколку постои интересен начин за да ги направиме незаборавни.
Кажете вака „Постојат три работи што треба да ги направиш“, или користете зборови како прво, второ, потоа, следно и последно. Тоа може да му помогне на вашето дете да ги има на ум сите чекори.
9. Бидете прецизни во она што го кажувате
Децата кои имаат проблеми со планирање, организација или јазикот може да имаат проблем со нејасно дадени упатства. Можеби мислите дека вашето дете не ги следи упатствата за чистење на неговата соба. Но, можеби вистинскиот проблем лежи во тоа што тоа не може да сфати како да започне.
Бидете конкретни. На пример, може да добиете подобри резултати велејќи: „Те молам стави ги алиштата на закачалка, потоа исчисти го подот и намести си го креветот“ наместо „Исчисти ја собата“.
10. Користете визуелни знаци
Децата кои имаат проблеми со обработката на јазикот може да имаат потешкотии да ги следат изговорените упатства. Размислете да користите визуелни знаци. На пример, посочете што треба да се исчисти. Можете исто така да покажете што барате од него. На пример, „Те молам постави ја остатокот од масата на ист начин како што го правам јас“.
