Козметиката што ја користиме може да влијае врз нашето здравје
Козметиката е направена да ни помогне, а не да ни одмогне, и во најголем дел од случаите нема несакани дејства од секојдневното користење на козметички средства. Но, ако некогаш сте ги прочитале ознаките на средствата за хигиена и декоративната козметика што ја користите, сигурно сте се запрашале какви се тие состојки кои се наведени и дали некои од нив се можеби штетни за нашето здравје. Од сите видови на хемиски состојки кои спаѓаат во составот на козметиката сепак постојат такви на кои треба да внимаваме.
Се препорачува да се обрне внимание на парфимираната козметика затоа што парфемите кои ги содржат можат да ја иритираат кожата. Парфимираните козметички производи се најчестата причина за појавата на алергии и иритации. Доколку вашата кожа е склона на алергии, се препорачува да ја избегнувате парфимираната козметика. Дури и производите кои се означени дека не се парфимирани можат да содржат мириси, односно хемиски состојки кои го прикриваат мирисот на други хемикалии во производот.
Триклосанот е хемиска состојка која влегува во составот на антибактериски сапуни, средства за туширање и во некои пасти за заби и дезодоранси. Оваа состојка го спречува создавањето на бактерии во козметичките производи, но може да има и негативни ефекти врз нашето здравје. Антибактериските козметички производи кои содржат триклосан немаат некои посебни придобивки за вашето здравје, па затоа се препорачува да се држите до обичните средства и сапуни кои не содржат триклосан.
Живата може да се најде во некои средства против акни или стареење на кожата и доколку ја има во поголеми количини од одобрените најчесто е штетна за организмот затоа што може да ги оштети бубрезите и нервниот систем.
[interaction id=”5613864874a791dd4b4d8b2f”]Декоративната козметиката, односно шминката може да предизвика алергија како резултат на некои од хемиските состојки. Кожата може да се иритира, да се појави црвенило, чувство на чешање или печење, итн. Акните можат исто така да бидат резултат на шминката што ја користиме. Најчесто, тие се резултат на козметиката на база на масла кои ги затвараат порите и предизвикуваат појава на акни. За да ги избегнете овие негативни последици врз вашата кожа најдобро е да избирате декоративна козметика која не содржи масла и парфеми зошто овие состојки најмногу ја иритираат кожата. Доколку забележите некакви реакции после користењето на било каков вид на козметика се препорачува веднаш да прекинете со употребата.
Маскарата е еден од козметичките производи на кои треба да се внимава. На четката од маскарата може да се насоберат бактерии кои би можеле да предизвикаат инфекција или иритација на окото. Купувајте нова маскара на секои три месеци.
Производите за исправување на косата кои се користат во фризерските салони може да содржат формалдехид, супстанца која може да е опасна за стилистите кои работат таму затоа што количините од формалдехидот кои се надвор од дозволените може да се поврзат со одредени проблеми со здравјето. Внимавајте на производите кои се означени дека содржат формалдехид, особено ако сте алергични на оваа состојка.
Количината на сите хемиски состојки кои влегуваат во составот на козметичките производи треба да биде регулирана за да нема штетни последици врз нашето здравје. Внимавајте на горенаведените примери и држете се на страна од непроверените производи без ознаки за состав.
