Сончевата светлина може да биде еден од најлесните начини за третирање на псоријазата.
Псоријазата е автоимуна состојба која предизвикува имунолошкиот систем да создаде премногу клетки на кожата. Овие клетки се акумулираат на површината на кожата во форма на кругови наречени плаки кои можат да предизвикаат чешање и болка. Многумина псоријазата ја третираат користејќи различни креми, стероиди и имуносупресивни лекови за олеснување на симптомите.Сепак, во многу случаи, оние што боледуваат од псоријаза забележуваат дека нивните симптоми стануваат подобри во текот на летото кога тие се повеќе изложени на сонцето. Ова не е случајност, бидејќи сончевата светлина може да биде корисна за оваа состојба на кожата доколку се користи правилно.
Сончевата светлина може да биде еден од најлесните начини за третирање на псоријазата, но сепак треба да се биде особено внимателни со изложувањето на сонце за да не се предизвика негативен ефект.
Како сончевата светлина помага за третирање на псоријазата?
Сонцето емитува ултравиолетови (УВ) зраци, кои се класифицирани како УВА и УВБ-зраци. Истражувањата покажуваат дека УВ-зраците имаат имуносупресивни ефекти што може да помогнат во намалување на симптомите на псоријазата.
Разликата помеѓу двата типови е во големината на бранот. УВА-зраците се движат со 320-400 нанометри и можат да навлезат длабоко во кожата, додека УВБ-зраците се движат со 280-320 нанометри и достигнуваат само до горните слоеви на кожата. Оттука, сами по себе природните УВА-зраци не се многу ефикасни во подобрување на симптомите на псоријаза, но УВБ-зраците се.
Изложеноста на природните УВБ-зраци може да го забави брзиот раст на клетките на кожата што е еден од главните симптоми на псоријазата. Истата може да помогне да се олесни воспалението и да се намали лупење на горниот слој на кожата кај луѓе со лесна до умерена псоријаза.
Сончевата светлина дополнително му помага на телото да создаде витамин Д – витамин којшто ја штити кожата и го регулира природниот имунитет. Витаминот Д не се наоѓа природно во многу видови храна, но редовно се додава во некои млечни производи.
Една студија покажала дека недостатокот на витамин Д може да биде честа појава кај луѓето со псоријаза, особено во зима кога изложувањето на сонце е намалено. Со оглед на тоа што витаминот Д помага да се заштити кожата и да се балансира имунолошкиот одговор на кожата, неопходно е луѓето што имаат псоријаза да бидат изложени на сончева светлина. Дерматолозите, исто така, честопати препорачуваат луѓето со псоријаза да користат кремови што содржат витамин Д.
Фототерапија и фотохемотерапија (ПУВА)
Фототерапија е процес на апсорпција на УВ-зраците за да се олеснат симптомите на псоријазата. Терминот „фототерапија“ обично се користи за да се опише изложеност на УВ-светлина во затворена просторија којашто е контролирана од стручно лице, како што е дерматолошка канцеларија.
УВБ-зраците се пожелни за лекување на псоријазата, бидејќи тие помагаат да се забави стапката на раст на клетките на кожата. Лекарите исто така може да препорача комбиниран третман наречен ПУВА терапија или фотохемотерапија. Во текот на овој третман, луѓето земаат лек наречен псорален, кој ја зголемува чувствителноста на телото на УВА-зраците пред да биде изложено на зраците.
ПУВА терапијата вообичаено се дава на луѓе кои имаат умерена до тешка псоријаза, но исто така може да се даде и на луѓе чија псоријаза не реагира на креми или УВБ-третмани. ПУВА терапијата е многу ефикасен третман за псоријаза и се користи долгорочно со цел да се избегне повторување на симптомите.
Правилно користење на сонцето
Кога луѓето со псоријаза внимателно и правилно ја користат сончевата светлина таа може да има позитивен ефект на состојбата на кожата. Поради ова стручните лица советуваат полека и внимателно да се започне со изложување на болните делови на сонцето со цел да се намалат шансите за негативен ефект, односно оштетување на кожата.
Дерматолозите најчесто препорачуваат ограничување на времето што едно лице го поминува на сонце секој ден. Дури и 10-минутно изложување на телото на сонце овозможува апсорбирање на сончевата светлина, истовремено намалувајќи го ризикот од оштетување на кожата. Ако се покаже дека телото го прифаќа ова и сонцето не ги влошува симптомите на псоријаза, изложеноста може да се зголемува постепени.
Ризици и мерки на претпазливост
Псоријазата е почеста кај луѓето со светол тен на кожата кои веќе имаат поголем ризик од изгореници поради помалото количество на меланин во кожата. Луѓето со псоријаза треба да избегнуваат прекумерно изложување на сончева светлина и да се заштитат од изгореници од сонце. Преголемата изложеност и изгорениците од сонце предизвикуваат оштетување на клетките што може да предизвика влошување на симптомите и прогресивност на псоријазата.
Затоа е важно да се преземат дополнителни мерки на претпазливост при изложување на кожата на сонце. Наоѓањето на добра заштита од сонце е клучен дел од изложување на сонце од секаков вид. Средствата за сончање со широк спектар на заштита може да бидат корисни бидејќи ја заштитуваат кожата од од УВА и УВБ-зраците. Дерматолозите вообичаено препорачуваат да се користат средства за заштита од сонце со фактор за заштита од сонце (SPF) од најмалку 30.
Некои лекови или третмани, исто така, може да ја направат кожата посензитивна кон светлината. Ова може да го зголеми ризикот од изгореници и оштетувања на кожата. Оттука е важна консултација со стручно лице за сите ризици поврзани со одредени лекови или третмани.
Носењето облека со долги ракави може да помогне во намалувањето на прекумерна изложеност на сонцето. Очилата за сонце се препорачуваат бидејќи осетливата кожа околу очите може да биде повеќе склона кон оштетување од сонцето.
