Споделете со пријателите!

Заштитете се од штетните зраци, УВ зрачењето делува врз кожата
Се вели дека кожата памти цел живот и секој дерматолог ќе ви го потврди ова. Доколку кожата е многу време изложена на сонце, таа добива сигнал дека треба да се самозаштити, што доведува до задебелување, оштетување, сувост и иритации. Премногу исончана кожа ја губи својата еластичност и побрзо се појавуваат старечки пеги. Токму затоа, превенитивата и соодветната заштита се пресудни за негувана кожа и убав, но пред сè, здрав тен.

Како делува УВ зрачењето врз кожата?

„Ултравиолетовото зрачење не се гледа, но предизвикува кожни заболувања вклучувајќи го и ракот на кожата“

Постојат неколку вида на УВ зраци – УВА, УВБ и УВЦ зраци. Ултравиолетовото зрачење не се гледа, но станува реално кога предизвикува кожни заболувања вклучувајќи го и ракот на кожата. УВ зрачењето се мери со индекс на УВ зрачење. Доколку индексот е 3 или над 3 тогаш изложеноста на сонце може да биде штетна за кожата и потребна е соодветна заштита од сонце. Дури и во случај кога индексот е помал од 3, за лица кои имаат почувствителна кожа потребна е заштита од сончевите зраци со соодветни препарати или пак облека. УВ зраците се најсилни помеѓу 10 и 17 часот во текот на денот, па токму затоа препораките за заштита од сонце велат да се избегнува излегување во овој период од денот во пролет и лето.

Ултравиолетовото зрачење доведува до создавање на слободни радикали, високо реактивни молекули коишто оштетуваат различни клеточни структури, го зголемуваат ризикот од брчки, бидејќи предизвикуваат оштетување на колагенот и еластинот со што непосредно влијаат на стареењето на кожата, развој на хронични и други болести, вклучувајќи рак на кожа.

Бидејќи УВ светлината има кратка бранова должина, може да допре само до горните слоеви на кожата, но сепак може да предизвика бројни негативни промени. УВА зраците придонесуваат за оштетеност на кожата и предвремено стареење, УВБ зрачењето е одговорно за изгорениците од сонце, додека УВЦ зраците не допираат до Земјата.

Повеќе од 90 проценти од УВ зраците можат да продрат преку облаците, така што задолжително нанесете препарат со заштитен фактор и тогаш кога е облачно. Заштитете се и кога сте под сенка, под чадор или во вода.

Кои заштитни препарати се најсоодветни?

Дерматолозите  препорачувата да се користат препарати кои нудат широк спектар на заштита (заштита од УВБ и УВА зраците). Препаратите коишто содржат комбинација на УВА и УВБ филтри нудат соодветна заштита на кожата за време на сончањето. Исто така, корисно е препаратите да содржат и витамини, особено витамин Е и Д-пантенол.

Прочитајте:  Хороскопските знаци како политичари

Витаминот Е ја подобрува хидратацијата на кожата и ја заштитува кожата од предвремено стареење. Д-пантенолот дејствува навлажнувачки и го спречува прекумерното губење влага од кожата за време на сончањето. Најнапред се употребуваат препаратите со највисок заштитен фактор, а потоа факторот се намалува. Намачкајте го целото тело 30 минути пред да одите на сонце и заштитени уживајте во летото и одморот.


Споделете со пријателите!